لاہور(آئی این پی)پاکستانی نژاد برطانوی باکسرعامرخان نے انٹرنیشنل باکسنگ ایسوسی ایشن کی جانب سے ریواولمپک میں پاکستان کی نمائندگی کے لیے دیے گئے موقع کو حاصل نہ کرنے کا فیصلہ کیا ہے۔گارجین کی رپورٹ کے مطابق عامر خان نے رواں ماہ وینزویلا میں ہونے والے اولمپک کوالیفائر میں شرکت نہ کرنے کے فیصلے کیا ہے جس کے بعد ان کی اولمپک میں پاکستان کی نمائندگی کرنے کے امکانات ختم ہوگئے ہیں۔واضح رہے عامر خان نے گزشتہ ماہ کراچی میں ایک تقریب کے دوران انٹرنیشنل باکسنگ ایسوسی ایشن کے تازہ فیصلے پر پوچھے گئے ایک سوال پر اولمپک میں پاکستان کی نمائندگی کرنے کی خواہش ظاہر کی تھی۔عالمی شہرت یافتہ باکسر کا کہنا تھا کہ تصور کیجیے اگر میں اولمپک میں اپنے مادر وطن کی نمائندگی کروں تو یہ میرے لیے بہت خاص ہوگا تاہم اس کا انحصار میرے پروموٹرز پر ہے جن کے ساتھ میرا پروفیشنل معاہدہ ہے، انگلینڈ واپسی پر میں اپنے پروموٹرز سے اس معاملے پر بات کروں گا ۔عامر خان نے 2004 کے ایتھنز گیمز میں سلور میڈل جیتا تھا لیکن انھیں اندازہ ہوگیا ہے کہ وہ ابھی اولمپک گیمز میں شرکت کے لیے مکمل طورپر تیار نہیں ہیں۔تاہم عامر گزشتہ ماہ میکسیکن باکسر کنیلو الواریز کے ہاتھوں ناک آٹ شکست کے بعد بحالی کے عمل میں مصروف ہیں۔اولمپک میں واپسی کی صورت میں ورلڈ باکسنگ کونسل کی جانب سے دو سالہ پابندی کے خطرے سے دوچار عامر خان ان چند پروفیشنل باکسرز میں سے ایک ہیں جنھوں نے انٹرنیشنل باکسنگ ایسوسی ایشن کے حالیہ فیصلے پر کھل کر بیان دیا ہے۔