ممبئی (مانیٹرنگ ڈیسک) عالمی شہرت یافتہ باکسر اور سابق ہیوی ویٹ چیمپیئن محمد علی کو خراج عقیدت پیش کرنے کے لیے عوام کے مطالبے پر مرحوم باکسر کی زندگی پر بننے والی فلم کو ایک بار پھر امریکا کی کئی سکرینز پر نمائش کے لیے پیش کیا جائے گا۔ محمد علی کا انتقال 4 جون کو 74 برس کی عمر میں ہوا ہے۔ وہ سانس کے عارضے میں مبتلا تھے۔میڈیارپورٹ کے مطابق سونی کے صدر روری بریئر کا کہنا تھا محمد علی کے انتقال کے بعد ہمیں ان کی سوانح حیات پر مبنی فلم کو ایک مرتبہ پھر پیش کرنے کے بہت سے پیغامات موصول ہوئے ہیں۔ان کا مزید کہنا تھا اس فلم میں محمد علی کو صحیح معنوں میں خراج تحسین پیش کیا گیا ہے، ایک ایسا شخص جس کے کھیل کے ساتھ ساتھ ذاتی زندگی سے بھی لوگ بے حد متاثر تھے۔ محمد علی واقعی عظیم تھے اور اس فلم کے ذریعے ان کو خراج عقیدت پیش کیا جائے گا۔واضح رہے کہ فلم ’’علی‘‘ 2001 ء میں ریلیز ہوئی، جس نے دنیا بھر میں تقریباً 8 کروڑ 70 لاکھ ڈالر کا منافع حاصل کیا تھا۔