لاہور(آئی این پی)پاکستان کرکٹ بورڈ نے غیر ملکی میڈیا منیجرز کی جانب سے انکار کے بعد انگلینڈ کے دورے کے لئے اپنے ہی میڈیا منیجر پر انحصار کرنے کا فیصلہ کیا ہے۔برطانیہ سے تعلق رکھنے والے برائن مرگڈ رائیڈ نے انگلینڈ میں میڈیا منیجر بن کر پاکستانی ٹیم کا امیج بہتر بنانے کے لئے35لاکھ روپے مانگے تھے لیکن پاکستا ن کرکٹ بورڈ نے 9ہفتے کے دورے کے لئے بھاری معاوضہ دینے سے انکار کردیا۔ جبکہ اور ایک غیر ملکی پیٹر اوبون نے بھی پہلے سے طے شدہ مصروفیت کی وجہ سے یہ کام کرنے سے انکار کردیا۔اب پی سی بی کے ڈائریکٹر اور جنرل منیجر باری باری انگلینڈ جائیں گے اور انگلش میڈیا کو کنٹرول کریں گے۔پی سی بی چیئرمین شہریار خان نے اتوار کو تصدیق کی کہ آغا اکبر کو اب پاکستان اے ٹیم کے بجائے سینئر ٹیم کے ساتھ بھیجا جا رہا ہے جبکہ سیریز کے دوسرے حصے میں پی سی بی کے ڈائریکٹر میڈیا امجد حسین بھٹی میڈیا کے معاملات سنبھالیں گے۔پاکستان کرکٹ بورڈ نے پیسے بچانے کے لئے اپنے ہی میڈیا ڈپارٹمنٹ پر انحصار کیا ہے۔میڈیا ڈپارٹمنٹ کے بارے میں پی سی بی کے چیئرمین گذشتہ ہفتے کہہ چکے ہیں کہ یہ شعبہ کمزور ہے اور اسے متحرک بنانے کی ضرورت ہے۔ اب اسی شعبے کے دو افسران کو مشکل ترین ٹاسک سونپا گیا ہے۔