لاہور ( این این آئی) پاکستان کرکٹ ٹیم کے منیجر انتخاب عالم نے کہا ہے کہ آئی سی سی یاسر شاہ کا ڈوپ ٹیسٹ کرنا چاہتی ہے جس کے بعد وہ ایک بار پھر ہدف بن سکتے ہیں۔یاسر شاہ کو گزشتہ سال ورلڈ اینٹی ڈوپنگ ایجنسی کی جانب سے ممنوعہ قراردی گئی ادویات کے استعمال پر پابندی لگادی گئی تھی۔آئی سی سی کے سامنے اپنی غلطی کو تسلیم کرتے ہوئے انہوں نے کہا تھا کہ لاعلمی میں اپنی بیگم کی بلڈ پریشر کی دوائی کھا ئی تھی۔ان کی پابندی کو رواں سال مارچ کے اواخر میں ختم کردیا گیا تھا جس کے بعد وہ انگلینڈ کے خلاف دورے کے لیے اہل ہوگئے تھے۔ٹیم منیجر انتخاب عالم کا کہنا تھا کہ ٹیسٹ کپتان مصباح، ون ڈے کپتان اظہر علی اور فاسٹ بالر جنید خان کے ساتھ ساتھ یاسر شاہ کا ڈوپ ٹیسٹ کیا گیا ہے لیکن لیگ اسپنر کا ٹیسٹ ہدف ہوسکتا ہے۔یاسر شاہ کو انگلینڈ کے دورے میں پاکستان کے لیے اہم بالر قرار دیا جا رہا ہے بالخصوص 4 میچوں پر مشتمل ٹیسٹ سیریز میں انھیں قومی ٹیم کے لیے اہم ہتھیار قرار دیا گیا ہے۔پاکستان ٹیم 14جولائی سے شروع ہونے والے اپنے دورے میں 4ٹیسٹ، 5ون ڈے اور ایک ٹی ٹوئنٹی میچ کھیلے گی۔آئی سی سی کی جانب سے ایک ایسے اہم موقعے پر پاکستانی کھلاڑیوں کا ڈوپ ٹیسٹ لیا جارہا ہے جب ٹیم انگلینڈ کے طویل دورے کی تیاری میں مصروف ہے ایسے وقت میں کسی کھلاڑی کا مثبت ٹیسٹ خطرناک ثابت ہوسکتا ہے۔آئی سی سی 2006ء سے واڈا کا رکن ہے جو مقابلوں کے دوران یا مقابلوں سے باہر کسی بھی وقت معمول کے ڈوپ ٹیسٹ کرتا ہے۔