لندن (این این آئی)انگلینڈ کرکٹ ٹیم کے بلے باز کیون پیٹرسن نے پاکستان کو ہوم سیریز میں مشکل حریف قرار دیتے ہوئے کہا ہے کہ پاکستان کی باؤلنگ بہترین ہے جس کے باعث مقابلہ دلچسپ ہوگا۔ایک انٹرویو میں انگلینڈ ٹیم سے باہر ہونے والے مایہ ناز بلے باز نے کہا کہ سری لنکن ٹیم پاکستان کی طرح بڑا چیلنج نہیں ہے۔کیون پیٹرسن نے رواں سال فروری میں پاکستان سپر لیگ (پی ایس ایل) میں کوئٹہ گلیڈی ایٹرز کی نمائندگی کی تھی جہاں انھوں نے ٹیم کی کامیابیوں میں اہم کردار ادا کیا تھاپاکستان کے دورہ انگلینڈ کے حوالے سے انہوں نے کہاکہ آپ پاکستان کونظرانداز نہیں کرسکتے کیونکہ ان کی باؤلنگ شاندار ہے۔قومی ٹیم کے کھلاڑیوں کی صلاحیتوں کا اعتراف کرتے ہوئے انھوں نے کہا کہ میں ان میں سے کچھ کا سامنا کرچکا ہوں ٗ میں نے دبئی میں پی ایس ایل میں شرکت کی اور ان کی ٹیم میں بہترین کھلاڑی ہیں۔انہوں نے کہاکہ امید ہے سری لنکا کے خلاف سیریز کے برعکس پاکستان کے ساتھ مقابلہ دلچسپ ہوگا لیکن جیت انگلینڈ کی ہوگی۔