لاہور(نیوز ڈیسک) پاکستان کرکٹ بورڈ کے چیئرمین شہر یار خان نے اپنے مستعفی ہونے کی خبروں کو بے بنیاد قرار دیتے ہوئے کہا ہے کہ ایشیاءکپ اور ٹی ٹونٹی ورلڈ کپ میں ٹیم کی ناقص کارکردگی کا جائزہ لینے کےلئے قائم کمیٹی نے جمعہ کی شام رپورٹ پیش کی ہے جس کا تفصیلی جائزہ لینے کے بعد ہی کوئی فیصلہ کروں گا۔ قذافی اسٹیڈیم میں میڈیا سے گفتگو کرتے ہوئے شہر یار خان نے کہا کہ حالیہ کچھ دنوںمیں میڈیا میں آنے والی خبروں کا حقیقت سے کوئی تعلق نہیں۔ میرے مستعفی ہونے کی پیشکش کی خبریں بھی آرہی ہیں جوبالکل بے بنیاد ہیں میں نے ایسی کوئی پیشکش کی اور نہ استعفیٰ دیا اور یہ بے بنیاد افواہیں ہیں ۔ انہوںنے کہا کہ یہ بھی کہا جارہا ہے کہ میںنے لوگوں کو نکالنا شروع کر دیا ہے حالانکہ میں بتانا چاہتا ہوں کہ ایشیاءکپ اور ٹی ٹونٹی میں ٹیم کی ناقص کارکردگی کا جائزہ لینے کے لئے قائم کمیٹی گزشتہ تین روز سے رپورٹ مرتب کر رہی تھی اور مجھے جمعہ کی شام یہ رپورٹ ملی ہے ۔ میں اس کا تفصیل سے جائزہ لینے کے بعد ہی کوئی فیصلہ لوں گا۔