لاہور (این این آئی)وزیراعلیٰ پنجاب مریم نواز شریف کے نوٹس پر 2غیرملکی خواتین کو بازیاب کرا لیا گیا۔
وزیراعلیٰ مریم نواز نے ہالینڈ سے موصول اغواء کی 15کال پر فوری ایکشن کے لیے پولیس کو 2گھنٹوں کا ٹاسک دیا، پولیس نے دو گھنٹوں میں غیر ملکی خواتین بازیاب کروا کر ملزمان کو گرفتار کر لیا۔ہالینڈ اور وینزویلا سے تعلق رکھنے والی خواتین اپنے دوستوں سے ملنے پاکستان آئیں، ہالینڈ میں موجود خاتون کے والد نے پاکستان میں ایمرجنسی 15پر کال کر کے اغواء کی اطلاع دی۔ایف آئی آر کے مطابق ملزمان نے خواتین کو تاوان کے لیے اغواء کیا اور 15لاکھ ڈالر تاوان مانگا، ملزمان پر خواتین سے زیادتی کرنے کا بھی الزام ہے۔ڈی آئی جی آپریشنز نے بتایا کہ غیر ملکی خاتون کے والد کی اطلاع پر پولیس نے فوری ریسکیو آپریشن شروع کیا، سیف سٹی کی مدد سے ملزمان کو ٹریس کر کے مغوی خواتین بازیاب کرائی گئیں۔انہوں نے مزید بتایا کہ ملزمان کے خلاف تھانہ ڈیفنس سی میں مقدمہ نمبر 1560/26درج کیا گیا، دو ملزمان گرفتار ہیں جبکہ دیگر کی گرفتاری کے لیے چھاپے مارے جا رہے ہیں، متاثرہ خواتین کا طبی معائنہ، شواہد کی روشنی میں مزید قانونی کارروائی جاری ہے۔
ذرائع نے پنجاب میں غیر ملکی خواتین کو بلا کر اغواء کرنے کا انکشاف کیا ہے، ایک بڑی سیاسی شخصیت کے نواسے کے خلاف مقدمہ درج کیا گیا ہے۔
