موہالی (نیوز ڈیسک) پاکستان کے سپیڈ سٹار شعیب اختر نے کہا ہے کہ اگر پاکستانی ٹیم سمجھتی ہے کہ وہ سیمی فائنل میں جانے کی حقدار ہے تو آج میچ جیت کر دکھائیں۔ تفصیلات کے مطابق آسٹریلیا کی بیٹنگ کے بعد نجی ٹی وی سے گفتگو کرتے ہوئے شعیب اختر کا کہنا تھا کہ وکٹ بلے بازوں کیلئے سازگار تھی اور لگ رہا تھا کہ بڑا سکور ہو گا لیکن پاکستانی باﺅلرز نے بھی اچھی باﺅلنگ نہیں کی جس کے باعث اتنا زیادہ سکور بن گیا۔ ان کا کہنا تھا کہ اگر پاکستانی ٹیم خود کو سیمی فائنل کی حقدار سمجھتی ہے تو پھر آج میچ جیت لے۔ شعیب اختر نے کہا کہ پاکستانی باﺅلرز سوچ کر باﺅلنگ نہیں کرتے، وہ نہیں دیکھتے کہ کون سی وکٹ پر کس طرح کی باﺅلنگ کرانی ہے، ورائٹی بہت کم تھی جس کا آسٹریلوی بلے بازوں نے خوب فائدہ اٹھایا۔