لاہور(نیوزڈیسک)پاکستان کرکٹ بورڈ (پی سی بی) کے چیئرمین شہریار خان نے کہا ہے کہ قومی ٹی ٹونٹی ٹیم کے کپتان شاہد آفریدی بطور کپتان کھیلیں گے یا کھلاڑی، فیصلہ ہم کریں گے۔پی سی بی کے چیئرمین شہریار خان کا لاہور میں میڈیا سے گفتگو کرتے ہوئے کہنا تھا کہ ورلڈ کپ کے بعد ریٹائرمنٹ کی شرط پر شاہد آفریدی کو کپتان بنایا تھا۔ شاہد آفریدی کے ریٹائرمنٹ واپس لینے کی بات میڈیا میں سنی۔ شاہد آفریدی کو ریٹائرمنٹ سے متعلق بات مجھ سے کرنی چاہیے تھی۔ تاہم ان کا کہنا تھا کہ کسی کھلاڑی کو ریٹائرمنٹ پر مجبور نہیں کر سکتے۔ شہریار خان کا کہنا تھا کہ بھارت کیخلاف قومی ٹیم کی کارکردگی مایوس کن رہی۔ دعا ہے کہ باقی میچوں میں کھلاڑی بہتر طریقے سے کھیلیں گے۔ ان کا کہنا تھا کہ بھارت کیخلاف محمد عامر کی کارکردگی اچھی رہی۔ بھارتی کپتان مہندر سنگھ دھونی اور ویرات کوہلی نے بھی محمد عامرکی بولنگ کا اعتراف کیا ہے۔ ایک سوال کا جواب دیتے چیئرمین پی سی بی نے کہا کہ قومی ٹیم کو سلیکٹ کرنا سلیکشن کمیٹی کا کام ہے۔ کن کھلاڑیوں کو کھلانا ہے اور کس کو نہیں، اس میں میرا کوئی عمل دخل نہیں ہوتا۔ انہوں نے بتایا کہ حکومت ہمیں بھارت میں ورلڈ کپ ٹی ٹونٹی کھیلنے کی اجازت دے چکی ہے۔ ہم بھارت ضرور جائیں گے۔ ہماری سیکیورٹی کی ذمہ داری بھارت اور آئی سی سی کی ہے۔