اسلام آباد (نیوز ڈیسک) حالیہ کشیدگی اور امریکا، اسرائیل، ایران جنگ کے باعث بحرین نے وزٹ ویزہ رکھنے والوں کے لیے ہر قسم کی نرمی کا اعلان کیا ہے۔

بحرین کی وزارت داخلہ کے تحت کام کرنے والی ایجنسی نیشنل پاسپورٹ اور رہائشی امور نے موجودہ علاقائی صورتحال کے پیش نظر وزٹ ویزا رکھنے والوں کے لیے غیر معمولی اقدامات کا اعلان کیا ہے۔ایجنسی کا کہنا ہے کہ جن لوگوں کے وزٹ ویزے 28 فروری 2026 تک کارآمد تھے، لیکن وہ پرواز کی منسوخی یا غیر معمولی حالات کی وجہ سے بحرین کا سفر کرنے سے قاصر تھے، ان کے ویزوں میں مزید تین ماہ کی توسیع کر دی جائے گی۔بحرین کا کہنا ہے کہ جن مسافروں کے ویزوں کی میعاد ختم ہو جاتی ہے انہیں ملک سے دیر سے روانگی پر عائد جرمانے سے مستثنیٰ قرار دیا جائے گا، یہ رعایت فضائی حدود کے دوبارہ کھلنے کے بعد ایک ماہ تک برقرار رہے گی۔