اسلام آباد (نیوز ڈ یسک)آل پاکستان پیٹرولیم ڈیلرز ایسوسی ایشن نے عید کے بعد ملک بھر میں ہڑتال کرنے کا اعلان کر دیا ہے۔
نجی ٹی وی کی رپورٹ کے مطابق پی پی ڈی اے کے وائس چیئرمین طارق حسن نے کہا کہ حکومت نے رات کے وقت اچانک پیٹرولیم مصنوعات کی قیمتوں میں اضافہ کر دیا۔ ان کے مطابق پیٹرولیم لیوی میں 21 روپے فی لیٹر اضافہ کیا گیا، جبکہ باقی 36 روپے فی لیٹر اضافے کے بارے میں وضاحت نہیں کی گئی، اس لیے مجموعی طور پر 55 روپے کے اضافے کی شفاف تحقیقات ہونی چاہئیں۔
طارق حسن کا کہنا تھا کہ پیٹرولیم ڈیلرز کے منافع میں اضافے کا وعدہ دو سال قبل کیا گیا تھا لیکن اب تک اس پر عمل درآمد نہیں کیا گیا۔ انہوں نے کہا کہ فی لیٹر 55 روپے اضافے کے بعد ڈیلرز کے لیے تیل خریدنے کی لاگت بڑھ گئی ہے جبکہ آئل مارکیٹنگ کمپنیوں کو اربوں روپے کا فائدہ پہنچا ہے۔
ایسوسی ایشن کے رہنماؤں نے خبردار کیا کہ اگر پیٹرولیم مصنوعات کی قیمتوں میں اضافے کی شفاف تحقیقات نہ کی گئیں اور ڈیلرز کا مارجن نہ بڑھایا گیا تو 26 مارچ سے ملک بھر میں غیر معینہ مدت کے لیے ہڑتال شروع کی جائے گی۔
