لاہور( این این آئی)محکمہ سکولزایجوکیشن نے موجودہ سکیورٹی صورتحال کے پیش نظر تمام سرکاری اور نجی سکولوں میں پنک بٹن ایمرجنسی الرٹ سسٹم نصب کرنے کی ہدایت جاری کر دی ہے۔
محکمہ تعلیم کی جانب سے جاری کردہ ہدایات کے مطابق یہ سسٹم ایک ایمرجنسی الرٹ میکانزم کے طور پر کام کرے گا، جس کے ذریعے کسی بھی خطرناک یا ہنگامی صورتحال میں فوری اطلاع دی جا سکے گی۔ اس اقدام سے پورے صوبے کے تعلیمی اداروں میں حفاظتی انتظامات کو مضبوط بنانے میں مدد ملے گی۔نئی ہدایات کے تحت پنجاب کے تمام سرکاری اور نجی سکولوں میں پنک بٹن سسٹم کی تنصیب لازمی قرار دی گئی ہے۔ اس کے علاوہ اس سسٹم کو مثر طریقے سے استعمال کرنے کے لیے اساتذہ اور طلبہ کی رجسٹریشن بھی ضروری قرار دی گئی ہے تاکہ ایمرجنسی کی صورت میں فوری طور پر الرٹ جاری کیا جا سکے۔محکمہ تعلیم نے تمام سکولوں میں سکیورٹی اقدامات مزید سخت کرنے کی ہدایت بھی دی ہے۔ اس سلسلے میں ضلعی تعلیمی اتھارٹیز کے چیف ایگزیکٹو افسران کو ہدایت دی گئی ہے کہ وہ جلد از جلد اپنے اضلاع میں پنک بٹن سسٹم کو فعال بنائیں۔
محکمہ تعلیم پنجاب نے خبردار کیا ہے کہ جو تعلیمی ادارے حکومت کی ہدایات کے مطابق پنک بٹن سسٹم نصب نہیں کریں گے ان کے خلاف سخت کارروائی کی جائے گی۔
