اسلام آباد (نیوز ڈیسک نادرا نے عوام کو سہولت فراہم کرنے کے لیے ایک نئی سہولت متعارف کرا دی ہے جس کے تحت 10 سال تک عمر کے بچوں کا ب فارم اب ای سہولت مراکز سے بھی حاصل کیا جا سکے گا۔
نادرا کے جاری کردہ اعلامیے کے مطابق والدین اپنے قریبی ای سہولت فرنچائز پر جا کر بچے کا ب فارم بنوا سکتے ہیں۔ اس کے لیے یونین کونسل سے جاری شدہ پیدائش کا سرٹیفکیٹ ساتھ لے جانا ضروری ہوگا۔نادرا نے شہریوں کو ہدایت کی ہے کہ وہ اپنے قریبی ای سہولت مرکز کے بارے میں معلومات نادرا کی ویب سائٹ پر دستیاب فہرست سے حاصل کر سکتے ہیں، جہاں تمام فرنچائزز کی تفصیلات فراہم کی گئی ہیں۔دوسری جانب نادرا نے قومی شناختی نظام کو مزید مضبوط اور درست بنانے کے لیے ایک اہم اقدام بھی مکمل کر لیا ہے۔ اس سلسلے میں سول رجسٹریشن کے ریکارڈ کو قومی شہری ڈیٹا بیس کے ساتھ ہم آہنگ کیا گیا ہے، جس کے بعد ایسے افراد کے شناختی کارڈ منسوخ کر دیے گئے ہیں جو سرکاری ریکارڈ میں متوفی درج تھے۔
نادرا کے مطابق نادرا آرڈیننس اور شناختی کارڈ رولز کے تحت مجموعی طور پر 42 لاکھ شناختی کارڈز منسوخ کیے گئے۔ ان افراد کی وفات کا اندراج تو صوبائی اداروں میں ہو چکا تھا لیکن نادرا کے ریکارڈ کو بروقت اپ ڈیٹ نہیں کیا گیا تھا۔
ادارے کے مطابق حالیہ اقدامات کے نتیجے میں تقریباً 30 لاکھ افراد کے لواحقین نے خود بھی متوفی عزیزوں کے شناختی کارڈ منسوخ کرانے کے لیے نادرا سے رجوع کیا، جبکہ بڑی تعداد میں ایسے شناختی کارڈ بھی فعال پائے گئے جو سول رجسٹریشن نظام میں وفات کے اندراج کے باوجود منسوخ نہیں کیے گئے تھے۔
