کراچی(نیوز ڈیسک)قومی ڈس ایبلڈ کرکٹ ٹیم نے پہلے ایک روزہ میچ میں افغانستان کو 109رنز سے شکست دے کر سیریز میں برتری حاصل کرلی۔نیشنل اسٹیڈیم کراچی میں فاتح کپتان حسنین عالم نے ٹاس جیت کر پہلے بیٹنگ کا فیصلہ کیا جو سودمند ثابت ہوا، ٹیم نے مقررہ 40 اوورز میں7وکٹ پر276رنز بنائے، عارف رچرڈ اور مطلوب قریشی نے پہلی وکٹ کی شراکت میں 132رنز جوڑے، عارف نے 72 گیندوں پر 11 چوکوں کی مدد سے 70 رنز بنائے، مطلوب نے 56 بالزپر58 رنز اسکور کیے، اس میں 5 چوکے بھی شامل تھے، کپتان حسنین عالم32، راو¿ جاوید28 اور دانش احمد27 رنز کے ساتھ نمایاں رہے۔ افغانستان کی جانب سے نبی اللہ نبی نے2 جبکہ عبداللہ، شفیق شمیم اور شیرین آغا نے 1، 1 کھلاڑی کو آو¿ٹ کیا۔جواب میں افغان ٹیم 32.2 اوورز میں 167رنز پر ڈھیر ہوگئی، عبداللہ اعجاز اور فیاض احمد نے 3، 3 کھلاڑیوں کو میدان بدر کیا جب کہ امیر احمد نے2 وکٹیں حاصل کیں۔ مہمان خصوصی پی سی بی کوچ و سابق ٹیسٹ کرکٹر توصیف احمد نے عارف رچرڈ کو مین آف دی میچ ایوارڈ دیا۔ سیریز کا دوسرا اور آخری ون ڈے جمعے کو کھیلا جائے گا۔