کراچی (مانیٹرنگ ڈیسک) 82 سال کی ضعیف خاتون اور اس کی نابینا بہن کے ساتھ بینک ملازم کی جانب سے 4 کروڑ سے زائد کے فراڈ کے کیس میں فریقین کے درمیان صلح کی درخواست پر بینکنگ کورٹ نے فیصلہ محفوظ کرلیا۔ فراڈ کرنے والے بینک ملازم ملزم نوید ملک نے تمام رقم اور سونا واپس کردیا جبکہ عدالت نے ملزم کی معافی اور صلح کی درخواست پر فیصلہ محفوظ کرلیا ہے۔ فیصلہ 15 فروری کو سنایا جائے گا۔ وفاقی تحقیقاتی ایجنسی (ایف آئی اے) کے مطابق نجی بینک کے منیجر آفتاب لاشاری کی شکایت پر ملازم کیخلاف مقدمہ درج کیا گیا تھا۔بینک میں ڈیزی پتلو اور پرسیا پتلو دو بہنوں کے مشترکہ دو اکاؤنٹس تھے۔ بینک انکوائری میں نوید ملک پر فراڈ ثابت ہوا تھا۔ ملزم نے ڈیزی پتلو کو منہ بولی ماں بنایا، پھر دھوکہ کیا۔