چین کی ایک مشہور ٹیکنالوجی کمپنی نے ملازمین کو منفرد انداز میں انعام دینے کی روایت قائم کر رکھی ہے — گزشتہ چار برسوں سے کمپنی بہترین کارکردگی دکھانے والے عملے کو خالص سونے سے بنے کی بورڈ بٹن (کی کیپس) بطور بونس پیش کر رہی ہے۔
تفصیلات کے مطابق، یہ روایت انسٹا 360 نامی کمپنی کی ہے جو چینی صوبے گوانگ ڈونگ کے شہر شینزن میں قائم ہے۔
حالیہ تقریب میں کمپنی نے شاندار کارکردگی دکھانے والے ملازمین کو 21 طلائی کی کیپس انعام میں دیے۔
ان میں سب سے بڑا اور قیمتی بٹن اسپیس کی (Space Key) پر مبنی تھا جس کا وزن 35.02 گرام بتایا گیا ہے۔
چونکہ یہ مکمل طور پر خالص سونے سے تیار کیا گیا تھا، اس کی مالیت تقریباً 3 لاکھ 20 ہزار یوان (یعنی ایک کروڑ 26 لاکھ پاکستانی روپے سے زائد) بنتی ہے۔
کمپنی ہر سال پروگرامرز ڈے کے موقع پر اپنے ملازمین کو اس طرح کے انعامات دیتی ہے۔
گزشتہ چند برسوں میں کمپنی اب تک 55 سونے کے بٹن اپنے عملے میں تقسیم کر چکی ہے، جبکہ سونے کی قیمتوں میں اضافے کے باعث ان تحائف کی قدر اب مزید بڑھ چکی ہے۔
دلچسپ بات یہ ہے کہ چینی ٹیک انڈسٹری میں انسٹا 360 کو مذاقاً “گولڈ فیکٹری” بھی کہا جاتا ہے کیونکہ یہ ادارہ اپنے ملازمین کو سونے کی شکل میں بونس دیتا ہے۔
رواں سال کمپنی کے 10 سال مکمل ہونے پر ہر ملازم کو “گولڈ بلائنڈ باکس” کے نام سے ایک خصوصی تحفہ دیا گیا جس میں 0.36 گرام وزنی خالص سونے کے اسٹیکرز موجود تھے۔
ڈبے پر لکھا تھا:

“اس کی چمک صرف سونے سے نہیں، آپ بھی اس کا حصہ ہیں۔”

مزید یہ کہ جن ملازمین کی شادی ہوتی ہے یا بچہ پیدا ہوتا ہے، کمپنی کی طرف سے انہیں ایک گرام وزنی سونے کا سکہ بھی تحفے میں دیا جاتا ہے۔
کمپنی کے بانی لیو جیانگ کانگ کے مطابق:

“ہم سونا اس کی دولت کے لیے نہیں دیتے بلکہ اس کے استحکام کی علامت کے طور پر دیتے ہیں، کیونکہ ہماری کمپنی کی اصل طاقت اس کے باصلاحیت ملازمین ہیں۔”