اسلام آباد (نیوز ڈیسک) گوجر خان کے علاقے میں ایک انتہائی افسوسناک اور لرزہ خیز واقعہ پیش آیا جہاں مبینہ طور پر سود خوروں نے ایک شادی شدہ خاتون کو مالی طور پر لوٹنے کے بعد زیادتی اور زہر دینے سے ہلاک کردیا۔تفصیلات کے مطابق، واقعہ تھانہ گوجر خان کے علاقے سٹی پیلس بابا رحیم شاہ میں پیش آیا، جہاں ایک مقامی جیولرز اور فنانس بینک کے ملازم نے اپنے ساتھی کے ہمراہ خاتون کو کروڑوں روپے مالیت کے زیورات اور رقم کے لین دین کے معاملے میں پھنسا کر بلیک میل کیا۔پولیس کے مطابق، خاتون کو بارہا زیادتی کا نشانہ بنایا گیا اور آخرکار اسے زہریلی گولیاں کھلا کر قتل کردیا گیا۔
اے ایس پی گوجر خان دانیال کاظمی کے مطابق، پولیس نے قتل اور زیادتی کے الزامات میں مقدمہ درج کر کے تفتیش کا آغاز کردیا ہے، جبکہ ملزمان کی گرفتاری کے لیے چھاپے مارے جا رہے ہیں۔ذرائع کے مطابق، خاتون کے موبائل فون سے ملنے والی ویڈیوز میں کئی ہوش ربا انکشافات سامنے آئے ہیں جن میں اس نے جیولرز اور بینک ملازم پر سود کے لین دین اور بلیک میلنگ کے ذریعے استحصال کا الزام عائد کیا۔متاثرہ خاتون کے شوہر نے بتایا کہ ملزمان نے ان کی اہلیہ کو مختلف دھمکیاں دے کر زبردستی پیسے بٹورے، یہاں تک کہ وہ پرائز بانڈز اور نقدی دینے پر مجبور ہوگئی۔انہوں نے مزید کہا کہ جب ملزمان کو یقین ہوگیا کہ وہ خاتون کو مکمل طور پر قابو میں لے چکے ہیں تو انہوں نے اسے بار بار جنسی زیادتی کا نشانہ بنایا اور سود و بھتے کے نام پر رقوم وصول کرتے رہے۔مدعی نے بیان دیا کہ وہ اور اس کے والد جب کاروبار کے سلسلے میں گھر سے باہر ہوتے تو ملزمان گھر آ جاتے یا اہلیہ کو باہر بلاتے تھے۔
ان کے مطابق، گھر میں گندم محفوظ رکھنے والی گولیاں موجود ہی نہیں تھیں، اس لیے واضح ہے کہ ملزمان نے زہریلی گولیاں خود پلائیں یا فراہم کیں۔مقتولہ کے نزع کے عالم میں ریکارڈ کیے گئے ویڈیو بیان میں بھی خاتون نے جیولرز اور دیگر افراد کو اپنی موت کا ذمہ دار ٹھہرایا۔پولیس کا کہنا ہے کہ ویڈیوز اور دیگر شواہد کی بنیاد پر مقدمے کی تفتیش جاری ہے تاکہ قاتلوں کو انصاف کے کٹہرے میں لایا جا سکے۔
