اسلام آباد (نیوز ڈیسک) عمرہ ویزے پر سعودی عرب جا کر بھیک مانگنے کے الزام میں چار افراد کو کراچی ایئرپورٹ پر حراست میں لے لیا گیا۔

ایف آئی اے کے مطابق یہ کارروائی اس وقت عمل میں آئی جب مذکورہ مسافر سعودی عرب سے واپس آ کر جناح انٹرنیشنل ایئرپورٹ کراچی پہنچے۔ گرفتار ہونے والوں میں تین کا تعلق ملتان جبکہ ایک کا تعلق لاہور سے بتایا گیا ہے۔حکام کا کہنا ہے کہ ابتدائی تحقیقات سے معلوم ہوا ہے کہ یہ افراد متعدد مرتبہ سعودی عرب کا سفر کر چکے ہیں اور وہاں بھیک مانگنے میں ملوث رہے ہیں۔ایف آئی اے نے ملزمان کے قبضے سے 12 ہزار سے زائد سعودی ریال کے علاوہ متحدہ عرب امارات کے درہم اور یورو بھی برآمد کیے ہیں، جبکہ ان کے پاس سے 20 ہزار روپے سے زائد پاکستانی کرنسی بھی ملی ہے۔

ترجمان ایف آئی اے کے مطابق ملزمان کو مزید قانونی کارروائی اور تفتیش کے لیے اینٹی ہیومن ٹریفکنگ سرکل (اے ایچ ٹی سی) کراچی کے حوالے کر دیا گیا ہے۔