لاہور ( این این آئی) اینٹی کرپشن پنجاب نے کارکردگی کی سالانہ رپورٹ جاری کر دی ۔ ڈی جی اینٹی کرپشن پنجاب ندیم سرور نے کہا کہ اینٹی کرپشن کو جنوری سے اکتوبر تک 19ہزار 940شکایات موصول ہوئیں ،کرپشن سے متعلق سب سے زیادہ شکایات پولیس اور

محکمہ ریونیو سے متعلق وصول ہوئیں۔ 3ہزار320 انکوائرئز کا آغاز کیا جس میں 962ایف آئی آرز درج کی گئیں۔ 1 ہزار 80کرپٹ عناصر کو گرفتار کیا جبکہ 573چالان عدالتوں میں پیش کئے۔ جبکہ 250عدالتی اور دیگر مفرور افراد کو بھی گرفتار کیا گیا ۔اینٹی کرپشن پنجاب نے 2ارب 43کروڑ روپے سے زائد بلواسطہ اور بلاواسطہ ریکوری قومی خزانے میں جمع کرائی ۔ ڈی جی اینٹی کرپشن نے کہا کہ گزشتہ پانچ برسوں کے دوران گریڈ 21سے 17تک کے 2ہزار 681سرکاری افسران کو گرفتار کیا گیا ،اینٹی کرپشن میں اس وقت ایک سو ہائی پروفائل کیسسز زیر تفتیش ہیں جس میں فیس نہیں کیس کے مطابق تفتیش جاری ہے۔ ندیم سرور نے بتایا کہ رانا ثنا اللہ اور سابق ڈپٹی سپیکر پنجاب اسمبلی دوست محمد مزاری کے خلاف کیسز میرٹ پر بنے ہیں سیاسی کیس نہیں ہیں۔ کرپشن کی روک تھام کے لئے میڈیا سمیت عوام کو بھی اداروں کا ساتھ دینا ہو گا۔