اسلام آباد (این این آئی)اسلام آباد ٹریفک پولیس نے لین وائلیشن کرنیوالی ہیوی گاڑیوں،بغیر ہیلمٹ موٹر سائیکل سواروں کیخلاف قانونی کارروائی مزید سخت اور موثر بنانے کا فیصلہ کیا ہے، اس حوالے سے زونل ڈی ایس پیز کو خصوصی ہدایات جاری کرتے ہوئے کہا ہے کہ
ٹریفک کی روانی کو متاثر کرنیوالے عناصرسے سختی سے نمٹا جائے،قانون کی پاسداری یقینی بناکر شہر میں مربوط ٹریفک نظام کی بحالی کو اولین ترجیح رکھا جائے ۔تفصیلات کے مطابق انسپکٹر جنرل آف پولیس اسلام آباد ڈاکٹر اکبر ناصرخاں کی خصوصی ہدایات کے مطابق اسلام آباد کو حادثات سے پاک رکھنے ، روڈ ڈسپلن کو قائم رکھنے اور شہر میں ٹریفک کی روانی کو یقینی بنانے کیلئے ٹریفک قوانین کی خلاف ورزی کرنیوالوں کے خلاف قانونی کارروائی کو مزید موثر بنانے کا فیصلہ کیا گیاہے،تمام زونل ڈی ایس پیزکوخصوصی طور پر لین وائلیشن کرنیوالی ہیوی گاڑیوں،بغیر ہیلمٹ اور لین کی خلاف ورزی کرنیوالے موٹر سائیکل سواروں سمیت دیگرٹریفک قوانین کی خلاف ورزی کرنے والوں کے خلاف قانونی کارروائی کومزید سخت اورموثر بنانے کیلئے خصوصی ہدایات جاری کی ہیں، اس سلسلے میں ا سلام آبادکیپٹل پولیس کی جانب سے اسپیشل انفورسمنٹ اسکواڈبھی تشکیل دیے گئے ہیں جو کہ شہر میں مختلف مقامات پر کارروائی کررہے ہیں،جبکہ اسلام آباد کیپٹل پولیس ایجوکیشن ونگ مختلف شاہراہوں پر شہریوں کو روڈ سیفٹی قوانین کے متعلق آگاہی فراہم کرنے میں مصروف عمل ہیں،ٹریفک کی روانی میں رکاوٹ بننے والی گاڑیوں،موٹر سائیکلز اور دیگر عناصر سے سختی سے نمٹا جائیگا، قانون کی پاسداری کوہر ممکن یقینی بنانا اور شہر میں مربوط ٹریفک نظام کی بحالی اولین ترجیحات ہیں،شہریوں سے اپیل ہے کہ وہ قانون کی پاسداری کرتے ہوئے ٹریفک پولیس سے تعاون کریں تاکہ شہر کو حادثات سے پاک رکھا جاسکے۔
