نیویارک(این این آئی)مائیکرو بلاگنگ ویب سائٹ ٹوئٹر کے چیف ایلون مسک نے سابق امریکی صدر ڈونلڈ ٹرمپ کے ٹوئٹر اکاونٹ کو بحال کر دیا۔ایلون مسک نے زیادہ تر ٹوئٹر صارفین کی رائے ڈونلڈ ٹرمپ کے ٹوئٹر اکاونٹ کی بحالی کے حق میں آنے کے بعد سابق امریکی صدر کے اکاونٹ کو بحال کردیا۔

ایلون مسک نے ٹوئٹر پر سابق صدر ڈونلڈ ٹرمپ کے ٹوئٹر اکاونٹ کی بحالی سے متعلق لوگوں کی رائے جاننے کے لیے ایک پول کروایا تھا۔اس پول پر 51.8 فیصد لوگوں نے ڈونلڈ ٹرمپ کے ٹوئٹر اکاونٹ کی بحالی کی حمایت میں جبکہ 48.2 فیصد لوگوں نے مخالفت میں ووٹ دیا۔پول کے نتائج سامنے آنے کے بعد ایلون مسک نے ڈونلڈ ٹرمپ کے ٹوئٹر اکاونٹ کی بحالی کا اعلان کیا تھا،انہوں نے اپنے ٹوئٹ میں لکھا کہ لوگ اپنی رائے دے چکے ہیں، ٹرمپ کے ٹوئٹر اکاونٹ کو بحال کر دیا جائے گا۔انہوں نے اپنے ٹوئٹ میں ایک مشہور لاطینی محاورہ بھی لکھا جس کا مطلب ہے کہ آوازِ خلق کو نقار خدا سمجھو۔واضح رہے کہ 6 جنوری کو کیپیٹل ہل حملے کے تناظر میں 2021 میں ڈونلڈ ٹرمپ کے ٹوئٹر اکاونٹ کو بند کر دیا گیا تھا۔سابق امریکی صدر نے بار بار ٹوئٹر کا استعمال کرتے ہوئے دعوی کیا تھا کہ نومبر 2020 کے انتخابات میں ان کی شکست ووٹروں کی بڑے پیمانے پر دھوکا دہی کی وجہ سے ہوئی۔ ماضی میں ٹوئٹر اکاونٹ مستقل طور پر بند کرنے سے قبل 7 جنوری کو امریکی صدر ڈونلڈ ٹرمپ کا ٹوئٹر اکاونٹ 12 گھنٹے کے لیے لاک کر دیا گیا تھا اور ساتھ ہی انہیں پابندی کی وارننگ بھی دی گئی تھی۔اس حوالے سے ٹوئٹر انتظامیہ نے کہا تھا کہ امریکی صدر ٹرمپ کے 3 ٹوئٹ ڈیلیٹ کیے گئے ہیں اور ان کا اکاونٹ 12 گھنٹوں کے لیے لاک کر دیا گیا ہے۔