لاہور ( این این آئی) چیئرپرسن چائلڈ پروٹیکشن بیورو سارہ احمد کو اٹلی کے شہر روم میں گلوبل کولیبو ریٹو ایوارڈ سے نوازا گیا۔چیئرپرسن سارہ احمد کو گلوبل کولیبو ریٹو ایوارڈ بچوں کے استحصال کی روک تھام اور بچوں کے حقوق کے تحفظ کیلئے کی گئی خدمات کے صلے میں نوازا گیا۔

پاکستان کے علاوہ دنیا بھر سے بچوں کے استحصال سے بچائو اوران کے حقوق کے تحفظ پر کام کرنے پر صرف 10 افراد کو گلوبل کولیبو ریٹو ایوارڈ سے نوازا گیا۔گلوبل کولیبو ریٹو ایوارڈ حاصل کرنے والوں میں یونیسف کی ڈائریکٹر، چائلڈ یو ایس اے کے سی ای او، سیرالیون کی خاتون اول، ہارورڈ یونیورسٹی کے پروفیسر، ہالی وڈ کے اداکار ٹیلر پیری اور دیگر شامل ہیں۔اس حوالے سے انہوں نے کہا کہ میں پی ٹی آئی چیئرمین عمران خان اور وزیراعلی پنجاب چوہدری پرویز الٰہی کی شکر گزار ہوں کہ انہوں نے مجھے کام کا موقع دیا اور ہمیشہ سپورٹ کیا۔یہ ایوارڈ ملنا میرے لئے اور پاکستان کے لیے اعزاز کی بات ہے، گلوبل کولیبو ریٹو ایوارڈ کو پاکستان کے تمام بچوں کے نام کرتی ہوں۔چائلڈ پروٹیکشن بیورو کی اپنی ٹیم کا شکریہ ادا کرتی ہوں جن کے کام کی بدولت مجھے یہ ایوارڈ ملا۔انہوں نے کہا کہ میرا مقصد تمام بے سہارا اور عدم توجہی کا شکار بچوں کو تحفظ فراہم کرنا اور بچوں کے استحصال کی روک تھام کو ممکن بنانا ہے۔بچوں کے استحصال سے بچا اور ان کے حقوق کے تحفظ کیلئے پہلے سے زیادہ ذمہ داری عائد ہوتی ہے اور اس ذمہ داری کو مزید احسن طریقے سے سرانجام دوں گی۔