لاہور(مانیٹرنگ ڈیسک) محکمہ داخلہ پنجاب نے صوبہ میں قیام پذیر بھارتی شہریوں کو ویزوں میں دی گئی توسیع کی معلومات پبلک کرنے سے انکار کر دیا ہے۔

روزنامہ جنگ میں آصف محمود سے کی شائع خبر کے مطابق  محکمہ داخلہ کو رائٹ ٹو انفارمیشن ایکٹ 2013 کے تحت درخواست دی گئی کہ پچھلے 10 سالوں کے دوران قیام پذیربھارتی شہریوں کے ویزوں کے حوالے سے معلومات فراہم کی جائیں ۔ پنجاب انفارمیشن کمیشن کی طرف سے معلومات کی عدم فراہمی پر محکمہ داخلہ کو نوٹس جاری کیا گیا جس پر پبلک انفارمیشن آفیسر نے کمیشن کے روبرو اپنے تحریری جواب میں بتایا کہ وفاقی وزارت داخلہ فارن نیشنلز کو ویزے کا اجراء کرنے کا اختیار رکھتی ہے جبکہ محکمہ داخلہ صرف ان کے ویزوں میں 90 دن تک توسیع دیتا ہے۔ محکمہ داخلہ کی پبلک انفارمیشن آفیسر نے کہا کہ اس ڈیٹا میں ایسی بھارتی خواتین شہریوں کے نام ہیں جنہوں نے پاکستانی مردوں سے شادیاں کیں اور وہ ان کے ساتھ کئی سالوں سے رہ رہی ہیں،تفصیل پبلک کرنے سے ان کو سیکورٹی خطرات لاحق ہو سکتے ہیں۔ اس لئے یہ معلومات دینے سے انکار کردیا گیا ہے ۔