اسلام آباد (این این آئی)حکومت نے مالی بحران کے دوران اپنے خزانے کو سہارا دینے کیلئے ماہانہ لاٹری اسکیم شروع کرنے کی تجویز کا جائزہ لینا شروع کر دیا ۔ نجی ٹی وی کے مطابق معاملات سے باخبر ذرائع نے بتایا کہ یہ تجویز مالیاتی ماہرین کی جانب سے پیش کردہ کئی

تجاویز میں سے ایک ہے جو دیوالیہ ہونے سے بچنے میں حکومت کے لیے معاون ثابت ہوسکتی ہے،لاٹری اسکیم سے جمع ہونے والی رقم کو ترقیاتی منصوبوں مثلاً ہسپتالوں، تربیتی اداروں کے قیام اور اجناس کی سبسڈی پر خرچ کیا جائے گا۔متحدہ عرب امارات ،امریکا، برطانیہ، سعودی عرب اور ملائیشیا میں بھی اس طرح کی اسکیمز کامیابی سے چلائی جارہی ہیں،توقع ہے جلد ایک ٹاسک فورس تشکیل دی جائے گی جو اسکیم کے قانونی پہلوؤں اور اس کے معیشت پر اثرات کا جائزہ لے گی۔ذرائع نے یاد دہانی کروائی کہ اس سے قبل 1989 میں اسلام آباد میں ساؤتھ ایشین فیڈریشن (سیف) اسکیم کا آغاز کیا گیا تھا جس سے بڑے پیمانے پر رقم جمع ہوئی تھی تاہم بعدازاں متعدد مذہبی اسکالر کی جانب سے اسے غیر اسلامی اور جوا قرار دینے کے فتووں کے بعد یہ اسکیم ختم کردی گئی تھی۔توقع کی جارہی ہے اس مرتبہ حکومت اسکیم متعارف کروانے کے فیصلے سے قبل مذہبی اسکالرز سے ان کی رائے طلب کرے گی۔معاشی ماہرین کے مطابق تجویز میں عالمی مالیاتی فنڈز کے خدشات کو بھی ملحوظِ خاطر رکھا جائے گا جن کا ماننا ہے کہ شہریوں کو سبسڈی کے ذریعے ریلیف نہیں دینا چاہیے، کیونکہ یہ عمل قومی خزانے پر بوجھ کے مترادف ہے۔

موضوعات:لاٹری