نئی دہلی(این این آئی)بھارتی ذرائع ابلاغ نے دعوی کیا ہے کہ چین نے مشرقی لداخ سیکٹر کے قریب اپنے ہوٹن ایئر بیس پر دو درجن سے زیادہ فرنٹ لائن طیارے تعینات کیے ہیں۔میڈیارپورٹس کے مطابق بھارت کے حکومتی ذرائع نے بتایاکہ چینی فضائیہ نے ہوٹان ایئر بیس پر

25 فرنٹ لائن فائٹرز رکھے ہیں جس میں ان کے جے 11اور جے 20جنگی لڑاکا طیارے شامل ہیں۔بھارتی خبر رساں ادارے نے ذرائع کے حوالے سے کہا کہ چین نے پہلے وہاں مگ 21 کلاس لڑاکا طیارے تعینات کر رکھے تھے، لیکن اب ان کی جگہ زیادہ قابل اور جدید ترین طیاروں نے لے لی ہے۔بھارتی حکام کے مطابق چینی فضائیہ بھارتی سرزمین کے قریب نئے ہوائی اڈے بنا رہی ہے، جس کی مدد سے وہ کم اونچائی سے مشن انجام دے سکتے ہیں۔ذرائع ابلاغ نے دعوی کیا کہ بھارتی ایجنسیاں پیپلز لبریشن آرمی کی فضائیہ (پی ایل اے اے ایف)کی سرگرمیوں پر گہری نظر رکھے ہوئے ہیں جو کہ بھارت کے ساتھ لائن آف ایکچوئل کنٹرول کے ساتھ شمال میں لداخ کے بالمقابل شمال مشرق میں اروناچل پردیش تک پھیلی ہوئی ہے۔دعوے کے مطابق چینی فضائیہ حالیہ دنوں میں پناہ گاہوں کی تعمیر، رن وے کی لمبائی میں توسیع اور بڑی کارروائیوں کے لیے اضافی فورسز کی تعیناتی کے ساتھ ان اڈوں کو اپ گریڈ کر رہی ہے۔دوسری جانب بھارت نے بھی ایل اے سی کے اپنے اطراف میں چینی افواج کی تیز رفتار سرگرمیوں کے پیش نظر تیاریوں کو بڑھا دیا ہے، اور فارورڈ ہوائی اڈوں پر جنگی طیاروں کو تعینات کیا ہے۔