لاہور( این این آئی)سپیکر پنجاب اسمبلی چودھری پرویز الٰہی نے کہا ہے کہ تحریک عدم اعتماد آگئی تو حمزہ شہباز فارغ ہیں،اراکین پنجاب اسمبلی پر پولیس تشدد کے خلاف ایکشن لیں گے، استحقاق کمیٹی میں آئی جی اور چیف سیکرٹری کو بلا کر سزا دیں گے۔سپیکر پنجاب اسمبلی
چودھری پرویز الٰہی سے وکلا ء وفد نے ملاقات کی جس میں صوبے کے آئینی اور سیاسی بحران پر گفتگو ہوئی۔انہوں نے کہا کہ سارے معاملے میں اصل سرغنہ آئی جی اور چیف سیکرٹری ہیں، (ن)لیگ کی کسی بات پر یقین نہیں کرتا، تحریک عدم اعتماد آگئی تو حمزہ شہباز فارغ ہیں۔انہوںنے کہا کہ عدالتی فیصلے کا انتظار ہے، پی ٹی آئی کے 20 لوٹے (ن)لیگ کا ٹکٹ مانگ رہے ہیں، حمزہ شہباز ان لوٹوں سے ملاقات نہیں کر رہے۔انہوںنے کہا کہ مریم نواز بھی انتخابات کی بات کر رہی ہیں، یہی بات عمران خان کر رہے ہیں۔انہوں نے کہا کہ حکمران عمران خان کو گرفتار کریں گے تو اپنی سیاسی قبر خود کھودیں گے،پنجاب میں بحران تب ختم ہوگا جب حمزہ شہباز گھر جائے گا۔انہوںنے کہا کہ حکومتی وزیروں کی کوئی اوقات ہے نہ اپنی سوچ اور نہ ویژن ہے۔وزیراعلی کے حلف سے متعلق چوہدری پرویز الٰہی نے کہا کہ وزیراعلی سے گورنر حلف لیتا ہے ،سپیکر قومی اسمبلی کیسے لے سکتا ہے۔انہوںنے کہا کہ عمران خان نے خون خرابے سے بچنے کے لیے اپنے لوگوں کو روکا،پولیس کی شیلنگ اور فائرنگ سے تین اموات ہوئیں۔،یاسمین راشد کینسر کی مریض ہیں انہیں یہ گھسیٹتے رہے۔
