لاہور(این این آئی) تحریک انصاف میں اسد کھوکھر گروپ بھی سامنے آ گیا جس نے متحدہ اپوزیشن کے امیدوار حمزہ شہباز شریف کی حمایت کا اعلان کر دیا۔ حمزہ شہباز گزشتہ روز اپنے وفد کے ہمراہ سابق صوبائی وزیر اسد کھوکھر کی رہائشگاہ پر گئے
جہاں پر سابق صوبائی وزیر اسد کھوکھر اور اعجاز مسیح نے متحدہ اپوزیشن کے وزارت اعلی کے امیدوار حمزہ شہباز کی حمایت کا اعلان کر دیا۔ملاقات میں نذیر چوہان بھی موجود تھے۔ اسد کھوکھر نے گروپ سمیت حمزہ شہباز کی حمایت کا اعلان کیا۔دوسری جانب جہانگیر خان ترین گروپ میں توڑ پھوڑ شروع ہو گئی،تین اراکین نے گروپ کے حمزہ شہباز کو ووٹ دینے کے فیصلے کے برعکس مخالف امیدوار چوہدری پرویز الٰہی سے ملاقات کر کے حمایت کی یقین دہانی کر ادی۔ ترین گروپ کے اراکین سید رفاقت علی گیلانی، عبد الحی دستی اور امیر محمد خان نے چوہدری پرویز الٰہی سے پنجاب اسمبلی میں ملاقات کر کے حمایت کا اعلان کیا۔رفاقت گیلانی نے کہاکہ چوہدری پرویز الٰہی بڑی بھائی ہیں ان کی حمایت کا اعلان کرتا ہوں۔عبد الحی دستی نے کہا کہ وزیر اعلی پنجاب کے لیے چوہدری پرویز الٰہی بہترین امیدوار ہیں۔ امیر محمد خان نے کہا کہ میں وزیر اعلیٰ کے امیدوار چوہدری پرویز الٰہی کو خود بھی ووٹ دوں گا اور ان کے لیے ترین گروپ کے دوسرے اراکین سے بھی ووٹ مانگوں گا۔
