لاہور(این این آئی) لاہور ہائی کورٹ نے گریٹر اقبال پارک میں کو خاتون ٹک ٹاکر کو ہراساں کرنے سے متعلق کیس کے ملزم ریمبو کی ضمانت منظور کرتے ہوئے ایک لاکھ روپے کے ضمانتی مچلکوں کے عوض رہا کرنے کا حکم دے دیا۔
لاہور ہائی کورٹ کے جسٹس شہرام سرور چودھری نے خاتون ٹک ٹاکر کو ہراساں کرنے سے متعلق کیس میں ملزم عامر سہیل عرف ریمبو، محمد ساجد ،، محمد حسین اور محمد بلال کی درخواستوں پر سماعت کی۔ملزمان کے وکلا نے عدالت کو بتایا کہ گریٹر اقبال پارک مقدمے کے شریک ملزموں کی ضمانتیں منظور ہو چکی ہیں، عائشہ اکرم نے بعد میں بلیک میلنگ کا الزام لگایا ، ملزموں سے تفتیش مکمل ہوچکی ہے۔وکلا کا کہنا تھا کہ ٹرائل ابھی تک شروع نہیں ہوا،ملزموں کو بلاجواز جیل میں قید رکھا گیا ہے، ضمانت پر رہائی کا حکم دیا جائے۔عدالت نے دلائل مکمل ہونے پر ملزم ریمبو سمیت چاروں ملزمان کی ضمانت بعد از گرفتاری منظور کرتے ہوئے ملزمان کو ایک ایک لاکھ روپے کے مچلکے جمع کروانے کا حکم دے دیا۔
