اسلام آباد (مانیٹرنگ ڈیسک) معروف صحافی کامران خان نے سماجی رابطے کی ویب سائٹ ٹوئٹر پر اپنے ویڈیو پیغام میں کہا کہ عمران خان صاحب میری کوشش رہی، عوام کی امیدیں قائم رہیں، تبدیلی کے وعدے پورے کرنے میں آپ کی حوصلہ افزائی کرتا رہوں، اب تھک رہا ہوں آپ سے جڑی امیدیں مدھم پڑ گئیں، اقتدار کے ساٹھ میں سے چالیس ماہ دو تہائی مدت گزر گئی،
ٹی ٹوئنٹی میچ کے آخری دس اوور میں 200 رنز چاہئیں کیا ٹیم عمران خان میں جان ہے؟ آپ کے خوشامدیوں میں سے کسی نے نہیں بتایا تو میں بتا دیتا ہوں آپ کی حکومت خطرناک بھنور میں پھنس چکی ہے، خطرہ ہے کشتی کنارا لگنے سے پہلے ڈوب جائے، آپ کپتان ہیں اس کو ڈوبنے سے بچائیں، کمر توڑ مہنگائی میں پسنے والے عوام تبدیلی کا انتظار کر رہے ہیں، چالیس ماہ گزر گئے بہتری کیا آتی ہر گزشتہ ہفتہ مہنگائی میں اضافہ کر رہا ہے، خان صاحب آپ نے جذباتیت دکھائی گزشتہ مہینہ آئی ایس آئی چیف کی تعیناتی معاملہ پاکستان کی جگ ہنسائی اور ہم سب کو ڈپریشن میں مبتلا کر گیا، شکر ہے ناقابل تلافی نقصان نہیں ہوا۔ آرمی لیڈر شپ آج بھی عمران خان کی پشت پر کھڑی ہے، مگر عام پاکستانی پریشان ہے، حکومت کے چوتھے سال میں اشیاء خورو نوش بجلی، گیس کا بل دوگنا ہو چکا ہے، افسوس پی آئی اے کا انٹرنیشنل فلائٹ کا آپریشن تقریباً ٹھپ پڑا ہے، ان گنت ریلوے حادثات نے نااہلی اور سانحات کی نئی تاریخ رقم کی، شوگر مافیا کے خلاف حکومتی ادارے آپ نے جتا دیے لیکن چینی کی قیمت سوا سو روپے کی قیمت ٹاپ گئی، احتسابی عمل کا یہ عالم کہ نیب کرپشن کیسز کے کسی بڑے مجرم کو سزا نہیں ہوئی بلکہ ایڑھی چوٹی کا زور لگانے کے باوجود عدالت نے شہباز شریف کو منی لانڈرنگ کیس میں بری کر دیا، الیکشن 2018ء میں کراچی نے اتنے ووٹ دیے کہ آپ ششدر رہ گئے
لیکن آپ نے پلٹ کے نہ دیکھا، چالیس ماہ پہلے آپ کو کراچی میں نواز شریف کا گرین لائن منصوبہ نصف پوزیشن میں ملا لیکن آج تک آپ گرین لائن نہ چلوا سکے۔ پنجاب میں چھ چھ آئی جیز اور چیف سیکرٹریز تبدیل کئے گئے، عثمان بزدار سے آپ کی پوری ٹیم بددل ہو گئی لیکن آپ کا اعتماد ٹھس سے مس نہ ہوا، خان صاحب آپ کے پاس صرف بیس ماہ ہیں سمجھیں ٹی ٹوئنٹی میچ ہے، آخری دس اوورز میں آپ نے 200 رنز کرنے ہیں ٹیم عمران خان اگر یہ معجزہ دکھا سکتی ہے تو کیا بات ہے۔
