اسلام آباد( آن لائن، این این آئی ) ملک میں کورونا وائرس سے مزید 79 افراد انتقال کر گئے ۔نیشنل کمانڈ اینڈ آپریشن سینٹر کی جانب سے جاری کردہ اعدادوشمار کے مطابق گزشتہ 24 گھنٹوں کے دوران 64 ہزار 53 کورونا ٹیسٹ کیے گئے جس میں سے 3 ہزار 980 کورونا مثبت کیسز سامنے آئے جب کہ مثبت کیسز کی شرح 6.21 فیصد ریکارڈ

کی گئی۔این سی او سی کے مطابق گزشتہ 24 گھنٹوں کے دوران کورونا وائرس کے باعث79 اموات رپورٹ ہوئیں جس کے ساتھ ہی ملک بھر میں کورونا کے باعث جاں بحق افراد کی تعداد 26 ہزار 114 تک پہنچ گئی ہے جب کہ کورونا کیسز کی مجموعی تعداد11 لاکھ 75 ہزار 558 ہوگئی ہے۔ دوسر ی جانب سول ایوی ایشن اتھارٹی (سی اے اے) نے کورونا وائرس کے ویکسی نیشن سرٹیفکیٹ کو رکھنے سے متعلق ہدایات نامہ جاری کر دیا جس کے مطابق سول ایوی ایشن اتھارٹی کے ہدایت نامے کے مطابق ڈومیسٹک اور انٹرنیشنل فلائٹس پر کورونا ویکسی نیشن سرٹیفکیٹ یکم اکتوبر سے لازمی قرار دیا گیا ہے۔سی اے اے کے ہدایت نامے میں کہا گیا کہ یکم اکتوبر سے بغیر کورونا ویکسی نیشن سرٹیفکیٹ کے ہوائی سفر پر پابندی ہو گی۔سول ایوی ایشن اتھارٹی کے ہدایت نامے میں کہا گیا ہے کہ 17 سال سے کم عمر افراد اور مریضوں کو کورونا ویکسین کے سرٹیفکیٹ سے استثنیٰ حاصل ہو گا۔ہدایت نامے میں سی اے اے کا کہنا ہے کہ

مریضوں کو استثنیٰ سے متعلق معالج کا میڈکل سرٹیفکیٹ دکھانا ہو گا۔سول ایوی ایشن اتھارٹی کے ہدایت نامے میں مزید کہا گیا ہے کہ پاکستان آنے اور جانے والے مسافروں کو سفر سے 72 گھنٹے قبل کورونا وائرس کے ٹیسٹ کی شرط برقرار رہے گی۔ہدایت نامے میں سول ایوی ایشن اتھارٹی نے یہ بھی کہا ہے کہ بیرونِ ملک جانے اور آنے والے مسافروں کے پاکستان کے ایئر پورٹس پر کورونا وائرس کے ریپڈ ٹیسٹ ہوں گے۔سول ایوی ایشن اتھارٹی (سی اے اے) نے تمام ایئر لائنز کو ان نئی ہدایات پر سختی سے عمل درآمد کی ہدایت کر دی ہے۔

موضوعات:کرونا