اسلام آباد (نیوز ڈیسک) قاسم آباد کے علاقے میں ایک شخص اور اس کی دو بیویوں کے قتل کا مقدمہ درج کرلیا گیا ہے،

جبکہ پولیس تفتیش میں واردات کی ممکنہ وجہ بھی سامنے آگئی ہے۔نجی ٹی وی چینل سما نیوز کی رپورٹ کے مطابق تھانہ نصیر آباد پولیس نے تین افراد کے قتل کا مقدمہ خود مدعی بن کر درج کیا، جو تعزیراتِ پاکستان کی دفعہ 302 کے تحت تین نامزد ملزمان کے خلاف قائم کیا گیا ہے۔پولیس حکام کے مطابق ایف آئی آر میں شہریار، ساجد اور مزمل مشتاق کو نامزد کیا گیا ہے۔ الزام ہے کہ ملزمان نے فائرنگ کر کے حسین نامی شخص کو اس کی دو بیویوں نور اور ندا سمیت قتل کیا۔ ابتدائی تحقیقات کے مطابق واقعے کی وجہ مقتول کی اپنی بیٹی کی نند سے شادی بتائی جا رہی ہے۔

واقعے کے بعد ملزمان جائے وقوعہ سے فرار ہوگئے تھے، تاہم پولیس نے ان کی گرفتاری کے لیے چھاپہ مار کارروائیاں شروع کر دی ہیں۔یاد رہے کہ بدھ کی رات قاسم آباد میں ایک گھر کے اندر فائرنگ کا واقعہ پیش آیا تھا جس میں حسن عرف بادشاہ اور ان کی دونوں بیویاں جان سے ہاتھ دھو بیٹھیں۔ ابتدائی معلومات میں رشتہ داری کے تنازع کو وجہ قرار دیا گیا تھا، جبکہ مقتول کے بیٹے نے بیان دیا تھا کہ واردات میں گاؤں سے آنے والے رشتہ دار ملوث ہیں۔