حکومت پنجاب نے صوبے میں نقد ادائیگی کے بجائے ڈیجیٹل نظام کو فروغ دینے کے لیے نیا اقدام اٹھاتے ہوئے تمام متعلقہ اداروں کو ہدایات جاری کر دی ہیں کہ کاروباری لین دین کو مرحلہ وار کیش لیس بنایا جائے۔
سرکاری مراسلے کے مطابق دکانداروں اور تجارتی مراکز کو پابند کیا گیا ہے کہ وہ ادائیگی کے لیے کیو آر کوڈ یا موبائل ایپ کے ذریعے رقم وصول کریں اور ہر دکان یا کاروباری مقام پر یہ سہولت نمایاں طور پر موجود ہو۔ حکام کا کہنا ہے کہ اس طریقہ کار سے لین دین میں شفافیت بڑھے گی، نگرانی آسان ہوگی اور صارفین کو سہولت میسر آئے گی۔پٹرول پمپس کو بھی فوری طور پر ڈیجیٹل ادائیگی کا نظام نافذ کرنے کا حکم دیا گیا ہے، جس کے تحت وہاں کیو آر کوڈ اور موبائل پیمنٹ دونوں سہولتیں فراہم کرنا لازم ہوگا۔ مزید یہ کہ آئندہ کسی بھی پٹرول پمپ کا لائسنس اسی صورت جاری کیا جائے گا جب وہ آن لائن بکنگ اور ڈیجیٹل ادائیگی کی سہولت فراہم کرے۔
حکام کے مطابق اس اقدام سے کاروباری سرگرمیوں میں شفافیت آئے گی اور شہریوں کے لیے لین دین محفوظ اور آسان ہوگا، جبکہ شہری حلقوں کا ماننا ہے کہ کیش لیس نظام سے فراڈ اور غیر قانونی مالی سرگرمیوں میں کمی آئے گی اور بینکاری شعبے میں جدید ٹیکنالوجی کے استعمال کو فروغ ملے گا۔
حکومت نے تمام کاروباری اداروں کو ہدایت کی ہے کہ مقررہ وقت کے اندر اندر ڈیجیٹل پیمنٹ سسٹم مکمل طور پر فعال کر کے اس پالیسی پر عملدرآمد یقینی بنایا جائے۔
