نئی دہلی (این این آئی )بھارتی ریاست ہریانہ میں ویلنٹائن ڈے کے موقع پر اہلیہ کو قتل کرنے والے شوہر کی جھوٹی کہانی کا بھانڈا پھوٹ گیا۔

بھارتی میڈیا کے مطابق ویلنٹائن ڈے کی رات ملزم انشل دھون نے پولیس کو فون کر کے دعوی کیا تھا کہ نامعلوم حملہ آوروں نے لوٹ مار کے دوران اس کی بیوی کا گلا کاٹ دیا ہے تاہم تفتیش کے دوران اس کے بیانات میں تضاد پایا گیا۔پولیس کے مطابق ملزم انشل بار بار کہانی بدل رہا تھا اور حملہ آوروں کی کوئی واضح تفصیل دینے سے قاصر تھا۔بھارتی میڈیا کے مطابق پولیس نے شک کی بنیاد پر جب ملزم انشل سے سخت انداز میں پوچھ گچھ کی تو اس نے اعترافِ جرم کر لیا۔پولیس نے بتایا ہے کہ انشل کو اپنی بیوی کے کردار پر شبہ تھا جس کے باعث دونوں کے درمیان اکثر جھگڑے ہوتے رہتے تھے، اسی شبے کی بنیاد پر انشل نے اپنی بیوی مہک کا قتل کیا۔

پولیس نے میڈیا کو بتایا ہے کہ واردات کے وقت انشل نے دستانے پہنے ہوئے تھے تاکہ فنگر پرنٹس پکڑے جانے سے بچ سکے، پہلے اس نے مہک کا گلا دبا کر اس کی جان لی اور بعد ازاں تیز دھار آلے سے گلا کاٹ کر تن سے جدا کر دیا۔بھارتی میڈیا کے مطابق مہک نجی بینک میں ملازمت کرتی تھی، دونوں کی شادی گزشتہ سال 25 ستمبر کو ہوئی تھی۔