اسلام آباد (نیوز ڈ یسک)رمضان المبارک شروع ہوتے ہی فضائی سفر کے نرخوں میں نمایاں اضافہ سامنے آیا ہے،
خاص طور پر عمرہ کی ادائیگی کے لیے جانے والے مسافروں کو زیادہ کرایوں کا سامنا کرنا پڑ رہا ہے۔ایوی ایشن ذرائع کے مطابق پہلے عشرے میں زائرین کی تعداد بڑھنے سے بزنس کلاس کا کرایہ بڑھ کر تقریباً پانچ لاکھ روپے تک پہنچ گیا ہے، جبکہ پہلے یہی ٹکٹ تقریباً چار لاکھ پچیس ہزار سے ساڑھے چار لاکھ روپے کے درمیان دستیاب تھا۔اسی طرح اکانومی اور اکانومی پلس کلاس کے ٹکٹ بھی مہنگے ہو گئے ہیں۔ جو کرایے پہلے تقریباً ایک لاکھ تیس یا چالیس ہزار روپے تھے، اب بڑھ کر ایک لاکھ اسی ہزار سے دو لاکھ روپے تک وصول کیے جا رہے ہیں۔ٹریول ایجنٹس ایسوسی ایشن کے رہنما خواجہ ایوب نسیم کا کہنا ہے کہ مختلف ایئر لائنز کی پروازیں تقریباً مکمل طور پر بک ہو چکی ہیں، جس کے باعث نئی نشستیں حاصل کرنا مشکل ہو گیا ہے۔
ان کے مطابق ایئر لائنز خالی بچ جانے والی نشستوں کے نرخ بھی بڑھا رہی ہیں اور ایجنٹس وہی قیمت وصول کر رہے ہیں جو کمپنیوں کی جانب سے مقرر کی جاتی ہے۔ماہرین کا خیال ہے کہ اگر زائرین کی تعداد اسی طرح بڑھتی رہی تو رمضان کے دوسرے اور تیسرے عشرے میں فضائی کرایوں میں مزید اضافہ دیکھنے کو مل سکتا ہے۔
