کوئٹہ (آن لائن)صوبائی مشیر برائے ماہی گیری میر اکبر آسکانی نے وزیراعلیٰ بلوچستان پرالزام عائد کیاہے کہ ان کے محکمہ میں بے جا مداخلت جاری ہے ،
مجھ سے صلاح ومشورہ کئے بغیر سیکرٹری اور ڈی جی کو تبدیل کردیاگیا کوئٹہ آکر جلد استعفیٰ کااعلان کرونگا۔ ان خیالات کااظہار انہوں نے جیو نیوز سے بات چیت کرتے ہوئے کیا۔ اکبر آسکانی نے کہا کہ میرے محکمے میں مداخلت کی جارہی ہے اور وزیراعلی کی جانب سے وعدوں پر عملدرآمد نہیں ہورہا ہے۔نہوں نے کہا کہ وزیراعلی میرے لیے قابل احترام ہیں مگر وہ میرے محکمے میں بے جا مداخلت کررہے ہیں، میری مرضی کے خلاف سیکرٹری اور ڈی جی کو تبدیل کردیا گیا، مجھ سے میرے محکمے کے حوالے سے کوئی صلاح مشورہ نہیں کیا جاتا ہے، میں ابھی تربت میں ہوں، جلد کوئٹہ آکر استعفے کا اعلان کروں گا۔خیال رہے کہ اس سے قبل بلوچستان حکومت میں شامل صوبائی وزیرتعلیم سردار یارمحمد رند بھی مستعفی ہوچکے ہیں۔ اسی طرح بی اے پی کے سردار صالح محمد بھوتانی بھی قلمدان واپس لینے پر استعفی دے چکے ہیں جب کہ حکمران جماعت کے اسپیکر عبد القدوس بزنجو اور وزیراعلی کے تعلقات بھی کشیدہ ہیں۔
