اسلام آباد (این این آئی)وفاقی حکومت نے اسلام آباد میں گاڑیوں کے ٹوکن ٹیکس میں اضافے کا فیصلہ کرلیا، گاڑیوں کی رجسٹریشن اور ٹرانسفر کی فیسوں میں بھی اضافہ کیا جائے گا۔وفاقی کابینہ نے ویسٹ پاکستان موٹر وہیکل ٹیکسیشن ایکٹ 1958میں ترامیم کی منظوری دے دی، جس کے ذریعے پرائیویٹ پبلک سروس اور کمرشل گاڑیوں کے ٹوکن ٹیکس میں اضافے کا اختیار دیا جا رہا ہے۔
وزارت داخلہ کی سمری میں کہا گیا ہے کہ موجودہ ٹوکن ٹیکس اور دیگر ریٹ 2019 سے تبدیل نہیں کیے گئے، ٹوکن ٹیکس کو صوبائی حکومتوں کے مساوی کیا جائے گا۔وزارت داخلہ کے مطابق ٹوکن ٹیکس اور دیگر فیسیں نہ بڑھانے سے ایکسائز اینڈ ٹیکسیشن (ای ٹی او) آفس کی کارکردگی متاثر ہو رہی ہے۔وفاقی کابینہ کی جانب سے فیسوں اور ٹوکن ٹیکس میں اضافے کے تعین کا اختیار وزارت داخلہ کو دینے کی منظوری دی گئی ہے۔
