دبئی (مانیٹرنگ، این این آئی) ایمریٹس ائیر لائن نے اگلے ماہ پاکستان سے پروازوں کی بحالی کی خوشخبری سنا دی، شمس عباس نقوی نامی پاکستانی صارف نے ٹوئٹر پر ایمریٹس انتظامیہ سے سوال کیا کہ پاکستان اور متحدہ عرب امارات میں فلائٹس کا کیا سٹیٹس ہے، آپ کے فیس بک پیج کے مطابق فلائٹس سات جولائی سے شروع ہو رہی

ہیں، خلیج ٹائمز کی خبر کے مطابق فلائٹس 21 جولائی تک معطل ہیں، کیا آپ اس کی وضاحت کریں گے۔ جس پر ایمریٹس کے نمائندے نے اپنے جوابی ٹوئٹ میں کہا کہ پاکستان سے دبئی کے لئے فلائٹس سات جولائی سے شروع ہو رہی ہیں، اس میں تبدیلی حالات کو مدنظر رکھتے ہوئے ہو سکتی ہے، نمائندے نے رائے دی کہ جو ایمریٹس کے ساتھ سفر کے خواہش مند ہیں وہ ہماری ٹریول اپ ڈیٹس پر نظر رکھیں۔ دوسری جانب متحدہ عرب امارات کی فیڈرل ایوی ایشن اتھارٹی نے واضح کیا ہے کہ بھارت، جنوبی افریقا اور نائجیریا سے آنے والے مسافروں کے ملک میں داخلے پر پابندی برقرار ہے اور اس میں کوئی تبدیلی رونمانہیں ہوئی ہے۔میڈیارپورٹس کے مطابق محکمہ شہری ہوابازی نے یہ وضاحت امارت دبئی کے ایک اعلان کے بعد جاری کی جس میں اس نے کہا کہ ان تینوں ممالک سے تعلق رکھنے والے مسافروں کے داخلے پر عاید پابندی میں نرمی کی جارہی ہے۔یو اے ای کی جنرل سول ایوی ایشن اتھارٹی نے ائیرمین (نوٹام)کو جاری کردہ ایک نوٹس میں اپنے 21 جون کے ایک اعلامیے کا حوالہ دیا۔اس میں پاکستان سمیت تیرہ ممالک سے آنے والے مسافروں کے یواے ای میں داخلے پر پابندی عاید کردی گئی تھی۔جنرل سول ایوی ایشن اتھارٹی کے ایک نمایندے نے وضاحت کی کہ بھارت سے آنے والے مسافروں کے یواے ای میں داخلے پر بدستور پابندی برقرار ہے لیکن انہوں نے واضح کیا کہ دبئی حکومت اس ضمن میں اپنی وضاحت جاری کرے گی۔