اسلام آباد (نیوز ڈٰیسک) سری لنکن کرکٹ بورڈ نے اس بات کی تصدیق کی ہے کہ پاکستان کے دورے پر موجود قومی ٹیم کے چند کھلاڑیوں نے سیکیورٹی خدشات کے باعث وطن واپس جانے کی خواہش ظاہر کی تھی۔ تاہم بورڈ نے واضح ہدایت دی ہے کہ ٹیم اپنا دورہ پاکستان طے شدہ پروگرام کے مطابق مکمل کرے۔بورڈ کے جاری کردہ اعلامیے میں کہا گیا ہے کہ بدھ کی صبح ٹیم مینجمنٹ نے اطلاع دی کہ کچھ کھلاڑیوں نے پاکستان میں قیام کے دوران اپنی سیکیورٹی کے حوالے سے تشویش ظاہر کی ہے۔

اس اطلاع کے بعد سری لنکا کرکٹ نے فوری طور پر کھلاڑیوں سے رابطہ کیا اور انہیں یقین دہانی کرائی کہ بورڈ پاکستان کرکٹ بورڈ (پی سی بی) اور متعلقہ سیکیورٹی اداروں کے ساتھ مسلسل رابطے میں ہے تاکہ ٹیم کے تمام اراکین کی حفاظت کے لیے جامع انتظامات یقینی بنائے جا سکیں۔اعلامیے کے مطابق، بورڈ نے ٹیم مینجمنٹ، کھلاڑیوں اور معاون عملے کو ہدایت دی ہے کہ وہ دورہ پاکستان کے شیڈول پر قائم رہیں اور سیریز میں شرکت جاری رکھیں۔

تاہم اگر کوئی کھلاڑی یا عملے کا رکن بورڈ کی ہدایت کے باوجود واپسی کا فیصلہ کرتا ہے، تو سری لنکن کرکٹ بورڈ متبادل کھلاڑی پاکستان روانہ کرے گا تاکہ سیریز متاثر نہ ہو۔مزید یہ بھی واضح کیا گیا ہے کہ اگر کوئی فرد بورڈ کے فیصلے کی خلاف ورزی کرتے ہوئے وطن واپس جاتا ہے تو اس کے طرزِ عمل کا تفصیلی جائزہ لیا جائے گا اور ضابطے کے مطابق کارروائی کی جائے گی۔

پاکستان کے وفاقی وزیرِ داخلہ اور کرکٹ بورڈ کے چیئرمین محسن نقوی کا کہنا ہے کہ وہ سری لنکن ٹیم کے دورہِ پاکستان جاری رکھنے کے فیصلے پر ان کے شکر گزار ہیں۔

انھوں نے ایکس پر لکھا کہ ’یہی ہے اصل سپورٹس مین سپرٹ اور باہمی یکجہتی کی خوبصورت مثال۔‘

محسن نقوی کے مطابق پاکستان اور سری لنکا کے درمیان ون ڈے میچز 14 اور 16 نومبر کو راولپنڈی میں کھیلے جائیں گے۔