اسلام آباد(نیوز ڈیسک)قومی ٹیم کے سابق کپتان شاہد آفریدی نے ٹی ٹوئنٹی ورلڈ کپ میں بھارت کی قومی کرکٹ ٹیم کے ہاتھوں شکست کے بعد کھلاڑیوں کی کارکردگی پر سخت ردِعمل دیا ہے۔

اتوار کو کھیلے گئے میچ میں بھارت نے پہلے بیٹنگ کرتے ہوئے 7 وکٹوں کے نقصان پر 175 رنز بنائے، جس کے جواب میں پاکستان کی قومی کرکٹ ٹیم 18 اوورز میں 114 رنز بنا کر آؤٹ ہوگئی اور اسے 61 رنز سے ہار کا سامنا کرنا پڑا۔میچ کے بعد شائقین اور سابق کرکٹرز کی جانب سے ٹیم کی کارکردگی پر شدید تنقید سامنے آئی، جبکہ آفریدی نے ایک نجی ٹی وی انٹرویو میں کہا کہ مقابلے کے دوران کئی غلط فیصلے کیے گئے اور بھارتی ٹیم مجموعی طور پر جیت کی زیادہ حقدار تھی۔ انہوں نے کپتان سلمان علی آغا کی حکمتِ عملی پر سوال اٹھاتے ہوئے کہا کہ عثمان طارق جیسے اہم بولر کو دس اوورز تک استعمال نہ کرنا سمجھ سے باہر تھا۔انہوں نے فاسٹ بولر شاہین شاہ آفریدی کی کارکردگی پر بھی تنقید کی اور کہا کہ ابتدائی اوور میں رنز دینے کے باوجود انہیں آخری اوور کروانا درست فیصلہ نہیں تھا جبکہ متبادل کے طور پر فہیم اشرف دستیاب تھے۔سابق آل راؤنڈر کا کہنا تھا کہ اگر اختیار ان کے پاس ہوتا تو وہ شاداب خان اور بابر اعظم سمیت چند سینئر کھلاڑیوں کو عارضی طور پر باہر بٹھا کر نوجوانوں کو موقع دیتے۔

ان کے مطابق تجربہ کار کھلاڑیوں سے بڑی ٹیموں کے خلاف بہتر کھیل کی توقع ہوتی ہے، لیکن جب وہ توقعات پر پورا نہ اتریں تو نئی صلاحیتوں کو آزمانا ضروری ہو جاتا ہے۔انہوں نے مزید کہا کہ اگلے میچ میں ابھرتے ہوئے کھلاڑیوں کو موقع دینا ٹیم کے مستقبل کے لیے مفید ثابت ہو سکتا ہے۔