اسلام آباد (نیوز ڈ یسک)ضلعی انتظامیہ نے محصولات سے متعلق امور میں شفافیت اور جدید ٹیکنالوجی کے استعمال کو یقینی بنانے کے لیے ای اسٹیمپنگ نظام باقاعدہ نافذ کر دیا ہے،
جبکہ ڈسٹرکٹ کلکٹر آفس کی طرف سے جاری تمام اسٹیمپ فروشی لائسنس فوری طور پر ختم کر دیے گئے ہیں۔ڈپٹی کمشنر اسلام آباد کے جاری کردہ اعلامیے میں بتایا گیا ہے کہ یہ اقدام ریونیو کے شعبے میں بہتری، مؤثر کارکردگی اور ڈیجیٹل نظام کے نفاذ کی حکمتِ عملی کا حصہ ہے۔ اعلامیے کے مطابق ای اسٹیمپنگ کے اجرا کے بعد شہر میں پرانے طرز کے اسٹیمپ وینڈنگ لائسنس برقرار نہیں رہیں گے۔سرکاری حکم نامے میں مزید کہا گیا کہ اس فیصلے سے متعلق وفاقی ٹریژری آفس اسلام آباد اور دیگر متعلقہ اداروں کو پہلے ہی ضروری ہدایات دی جا چکی تھیں، لہٰذا نئے نظام کے نافذ ہوتے ہی سابقہ لائسنس ازخود منسوخ تصور ہوں گے۔ انتظامیہ کے مطابق اس ڈیجیٹل طریقہ کار سے محصولات کی وصولی زیادہ شفاف ہوگی اور دھوکہ دہی یا بے ضابطگیوں کے امکانات کم ہوں گے۔
