اسلام آباد(آئی این پی ) سینیٹ کا اجلاس (آج) پیر سے شروع ہو گا ، اجلاس میں اہم قانون سازی کے علاوہ مختلف امور پر بحث کی جائے گی، اجلاس میں سٹیٹ بینک آف پاکستان( ترمیمی) بل 2018 اور معذور افراد کو روزگار کی فراہمی سے متعلق بل پیش کئے جائیں گے جبکہ اسلام آباد کے نئے ایئرپورٹ کا نام بے نظیر بھٹو رکھنے اور ایف بی آر کے چیئرمین کی تعیناتی پارلیمانی کمیٹی کی

منظوری سے کرنے سے متعلق قرار دادیں بھی پیش کی جائیں گی ۔تفصیلات کے مطابق سینیٹ کا اجلاس (آج) پیر کو چیئرمین محمد صادق سنجرانی کی صدارت میں سہ پہر تین بجے ہو گا، سینیٹ سیکرٹریٹ نے اجلاس کا 27نکاتی ایجنڈا جاری کر دیا ہے جس کے مطابق اجلاس میں مختلف بل پیش کئے جائیں گے ، سینیٹر رضا ربانی سٹیٹ بینک آف پاکستان( ترمیمی) بل 2018پیش کریں گے،سینیٹر اعظم خان سواتی معذور افراد کو روزگار کی فراہمی سے متعلق بل پیش کر یں گے ،اجلاس میں اہم قرار دادیں بھی پیش کی جائیں گی ، سینیٹر میاں رضا ربانی اسلام آباد کے نئے ایئرپورٹ کا نام بے نظیر بھٹو رکھنے سے متعلق قرار داد پیش کر یں گے ، سینیٹر اعظم خان سواتی ایف بی آر کے چیئرمین کی پانچ سال کے لئے تعیناتی پارلیمانی کمیٹی کی منظوری سے کرنے سے متعلق قرار داد پیش کر یں گے ،اجلاس میں مختلف تحاریک بھی پیش کی جائیں گی ،سینیٹر طلحہ محمود خارجہ پالیسی پر بحث کرانے کی تحریک پیش کریں گے،سینیٹر شیری رحمان اسلام آباد میں پلاسٹک کی آلودگی کے اثرات پر بحث کرانے کی تحریک پیش کریں گی۔)