نئی دہلی(نیوز ڈیسک)اسٹیٹ بنک آف انڈیا نے 70ہزار ملازمین کو جھٹکا دے دیا، اوور ٹائم کی مد میں ادا شدہ اضافی رقوم کی واپسی کا مطالبہ کر دیا، اسٹیٹ بینک آف انڈیا نے نوٹ بندی کے دوران 70ہزار ملازمین کو اوور ٹائم کی مد میں اضافی رقم ادا کی تھی ۔

بھارتی میڈیا کے مطابق اسٹیٹ بینک آف انڈیا نے نوٹ بندی کے دوران 70ہزار ملازمین کو اوور ٹائم کی مد میں اضافی رقم ادا کی تھی جسے اب ملازمین سے واپس کرنے کا مطالبہ کررہا ہے۔ایس بی آئی نے اپنے تمام زونل ہیڈکوارٹرز کو جو خط ارسال کیا اس میں تحریر ہے کہ بینک صرف اپنے ملازمین کو اضافی کام کے عوض پیسہ دیں نہ کہ سابق ایسوسی ایٹ بینک کے ملازمین کو ۔ ایس بی آئی نے واضح کیا کہ 2016 میں نوٹ بندی کے دوران اوورٹائم کیلئے ایسوسی ایٹ بینک کے ملازمین کو ادا کی گئی رقم واپس لی جائے ۔اضافی ادائیگی صرف ان ملازمین کیلئے تھی جو اسٹیٹ بینک آف انڈیا کی شاخوں میں خدمات انجام دے رہے تھے۔ بینک نے کہا کہ اوورٹائم کیلئے اضافی ادائیگی کا اعلان اس وقت کیا گیا تھا جب ایسوسی ایٹ کے بینکوں کا انضمام ایس بی آئی میں نہیں ہوا تھا لہذا ان کے ملازمین بنیادی طور پر ایس بی آئی کے ملازمین تصور نہیں کئے جائیں گے جس کی وجہ سے وہ اضافی رقم کی ادائیگی کے حقدار نہیں ۔