اسلام آباد(نیوز ڈیسک)دنیا کی سب سے بڑی کرپٹو کرنسی بِٹ کوائن کی قدر میں نمایاں کمی دیکھنے میں آئی ہے اور یہ گزشتہ چار ماہ کی کم ترین سطح پر پہنچ گئی ہے۔رپورٹس کے مطابق، بِٹ کوائن کی قیمت جون کے بعد پہلی بار ایک لاکھ ڈالر کی حد سے نیچے گر گئی۔ تازہ ترین اعداد و شمار کے مطابق، اس کی قدر میں 6.7 فیصد کمی ہوئی ہے جس کے بعد یہ 99,936 ڈالر پر ریکارڈ کی گئی۔

گزشتہ ماہ بِٹ کوائن کی قیمت 1 لاکھ 26 ہزار ڈالر تک جا پہنچی تھی، تاہم اس کے بعد سے مارکیٹ میں مسلسل گراوٹ کا سلسلہ جاری ہے اور مجموعی طور پر 20 فیصد سے زائد کمی دیکھنے میں آچکی ہے۔صرف بِٹ کوائن ہی نہیں بلکہ دیگر ڈیجیٹل کرنسیوں کی قیمتوں میں بھی نمایاں کمی واقع ہوئی ہے۔ ایتھیریم کی قدر میں تقریباً 10 فیصد اور ایکس آر پی (XRP) میں 6 فیصد تک کمی ریکارڈ کی گئی۔کرپٹو مارکیٹ میں اس گراوٹ کے اثرات امریکی اسٹاک مارکیٹس پر بھی پڑے ہیں۔ ایس اینڈ پی 500 انڈیکس میں 1.2 فیصد جبکہ نیسڈیک میں 2 فیصد کمی دیکھی گئی۔امریکی مالیاتی ماہرین کے مطابق، کرپٹو کرنسیوں کی قیمتوں میں حالیہ کمی کی ایک بڑی وجہ سرمایہ کاروں کا محتاط رویہ اور عالمی معاشی غیر یقینی صورتحال ہے، جس کے باعث وہ بڑے پیمانے پر سرمایہ کاری سے گریز کر رہے ہیں۔