لاہور(آئی این پی)معروف گلوکار بلال سعید پر عدالت کے باہر نامعلوم افراد کا حملہ۔ ’’ دو نمبر ‘‘گانے سے شہرت کی بلندیوں پر پہنچنے والے گلوکار بلال سعید جب دو نمبری کے مقدمے میں عدالت پیش ہوئے تو نامعلوم افراد نے ان پر حملہ کردیااور خو ب دھلائی کی۔ معروف گلوکار بلال سعید چوری کے مقدمے میں ضمانت قبل از گرفتاری کیلئے ایڈیشنل سیشن جج کی عدالت میں پیش ہوئے تاہم عدالت کے باہر چند نامعلوم افراد نے ان پر حملہ کردیا اور خوب دھلائی کی۔
بلال سعید کی دھلائی دیکھ کر وکلا میدان میں آئے اور انہوں نے تھرڈ امپائر کا کردار ادا کرتے ہوئے معاملہ رفع دفع کرادیا۔تاہم نامعلوم افراد کی جانب سے کیے جانے والے حملے میں انہیں معمولی چوٹیں آئیں ہیں، حملے کے بعد بلال سعید کا ابھی تک کوئی ردعمل سامنے نہیں آیا ۔واضح رہے کہ بلال سعید پر ایک لڑکی کے ساتھ مل کر اسی کی ماں کے 8 کروڑ روپے چوری کرنے کا الزام ہے۔