لاہور( این این آئی)صوبائی دارالحکومت لاہور کے علاقے اچھرہ میں نجی ٹیوشن سینٹر کے واش روم سے ایک بچی کی لاش برآمد ہوئی ہے ۔
پولیس کے مطابق چھٹی کلاس کی طالبہ نعیمہ روزمرہ کی طرح اپنے گھر سے ٹیوشن پڑھنے گئی تھی جہاں واش روم سے اس کی لاش برآمد ہوئی ہے۔واقعے کی اطلاع ملتے ہی ایس پی ماڈل ٹائون اسد علی اور اے ایس پی گلبرگ پولیس کی بھاری نفری کے ہمراہ موقع پر پہنچ گئے۔مقتولہ بچی کے تایا عمران نے میڈیا سے گفتگو کرتے ہوئے بتایا کہ نعیمہ اپنی بہن کے ہمراہ گھر سے ٹیوشن پڑھنے گئی تھی، ہمیں ساڑھے 4 بجے ٹیوشن سینٹر سے اطلاع ملی کہ نعیمہ بیہوش ہو گئی ہے۔ورثا ء کے مطابق بچی کو فوری طور پر سروسز ہسپتال منتقل کیا گیا جہاں ڈاکٹرز نے معائنے کے بعد اس کی موت کی تصدیق کر دی۔
ایس پی ماڈل ٹائون اسد علی کے مطابق پولیس نے حقائق کا جائزہ لینے کے بعد بچی کی لاش کو پوسٹمارٹم کے لیے مردہ خانے منتقل کر دیا ہے۔انہوں نے مزید بتایا کہ واقعے کی سائنسی اور روایتی خطوط پر تحقیقات کا باقاعدہ آغاز کر دیا گیا ہے تاہم موت کی اصل وجہ اور واقعے کے حقیقی محرکات کا تعین پوسٹمارٹم رپورٹ اور مزید تفتیش کے بعد ہی ممکن ہو سکے گا۔
