اسلام آباد (نیوز ڈیسک)لندن سے لاہور پہنچنے والے اینکر پرسن اور پوڈکاسٹر ریحان طارق کو قومی سائبر کرائم تحقیقاتی ایجنسی (NCCIA) نے حراست میں لے لیا۔ بعد ازاں انہیں عدالت میں پیش کیا گیا،
جہاں جوڈیشل مجسٹریٹ نے تفتیشی ادارے کی درخواست منظور کرتے ہوئے 6 روزہ جسمانی ریمانڈ دے دیا۔اطلاعات کے مطابق ریحان طارق منگل اور بدھ کی درمیانی شب لاہور ایئرپورٹ پہنچے تو ابتدا میں فیڈرل انویسٹی گیشن ایجنسی (FIA) کے اہلکاروں نے انہیں روکا۔ بعد میں این سی سی آئی اے کی ٹیم موقع پر پہنچی اور انہیں اپنی تحویل میں لے کر قانونی کارروائی کا آغاز کیا۔صحافی ثاقب بشیر کے مطابق ملزم کے خلاف ڈپٹی ڈائریکٹر رضوان صابر کی مدعیت میں توہینِ مذہب اور پیکا ایکٹ کی مختلف دفعات کے تحت مقدمہ درج کیا گیا ہے۔
سخت سیکیورٹی انتظامات کے تحت این سی سی آئی اے کی ٹیم ریحان طارق کو جوڈیشل مجسٹریٹ نعیم وٹو کی عدالت میں پیش کرنے پہنچی۔ عدالت کے باہر گاڑی سے اترتے وقت ریحان طارق نے “پاکستان زندہ باد” کے نعرے بھی لگائے۔عدالتی کارروائی کے دوران تفتیشی حکام نے ملزم کے جسمانی ریمانڈ کی استدعا کی، جسے عدالت نے منظور کرتے ہوئے ریحان طارق کو چھ روز کے لیے قومی سائبر کرائم تحقیقاتی ایجنسی کے حوالے کر دیا تاکہ مزید تحقیقات مکمل کی جا سکیں۔
