ملتان (این این آئی) سوشل میڈیا کے ذریعے شہرت کی بلندیوں کو چھونے والی ماڈل قندیل بلوچ کے والد نے کہا ہے کہ جب قندیل بلوچ کا قتل ہوا تو وہ گھر میں ہی موجود تھے۔ نجی ٹی وی کے مطابق والد نے پولیس کو بیان دیا ہے کہ وہ اور ان کی اہلیہ اور بیٹا وسیم گھر پر تھے ٗ وہ، اپنی اہلیہ اور بیٹے کے ساتھ چھت پر سو رہے تھے ٗ قندیل بلوچ نیچے اپنے کمرے میں سوئی ہوئی تھی۔ وسیم رات کو 3 بجے چھت سے نیچے اترا اور کمرے میں جا کر قندیل بلوچ کا گلا دبا کر اسے قتل کر دیا۔ انہوں نے کہاکہ جب وہ صبح نیچے آئے اور دس بجنے پر بھی قندیل بلوچ کمرے سے باہر نہ آئی تو وہ کمرے میں گئے اور قندیل بلوچ کو مردہ حالت میں پایا جس کے بعد انہوں نے پولیس کو اطلاع کر دی۔ سی پی او اظہر اکرام نے میڈیا سے گفتگو کرتے ہوئے کہا کہ قندیل بلوچ سال میں ایک دفعہ اپنے گھر والدین سے ملاقات کیلئے آتی ہیں اور وہ اس سال عیدالفطر کے دوسرے دن یہاں آئی تھیں اور تب سے یہیں رکی ہوئی تھیں۔