ملتان(مانیٹرنگ ڈیسک)ماڈل قندیل بلوچ نے ملتان میں اپنی موجودگی کو میڈیا سے خفیہ رکھے رکھا۔ماڈل چاند رات سے ملتان کے نواحی علاقے مظفرآباد کے ایک گھر میں مقیم تھیں۔تفصیلات کے مطابق گزشتہ شب ملتان میں قتل ہونے والی ماڈل واداکارہ قندیل بلوچ نے ملتان میں اپنی موجودگی کو میڈیا سے خفیہ رکھے رکھا۔دو روزقبل بھی ملتان کے صحافیوں سے گفتگو کرتے ہوئے ان کا کہنا تھا کہ وہ ملتان میں نہیں ہیں وہ ان دنوں کراچی میں مقیم ہیں۔
دوسری طرف قندیل بلوچ کے مالک مکان اور پولیس حکام کا کہنا ہے کہ ماڈل چاند رات سے ملتان کے نواحی علاقے مظفرآباد کے گرین ٹاؤن میں مقیم تھیں۔ذرائع کے مطابق ابھی تک اس بات کی تصدیق نہیں ہو سکی کہ قندیل بلوچ نے اپنی ملتان میں موجودگی کو کیوں خفیہ رکھا؟ ذرائع کے مطابق یہ بہت اہم سوال ہے کہ قندیل بلوچ کس کے کہنے پر ملتان آئیں اور انہوں نے اپنی موجودگی کو خفیہ کیوں رکھا؟قندیل بلوچ کو کس نے مشورہ دیا تھا کہ وہ ملتان جائیں؟ ذرائع کے مطابق درج بالا سوالات اہمیت اختیار کر گئے ہیں اور ان پر مزید تفتیش جاری ہے۔