ممبئی (نیوز ڈیسک) بالی ووڈ ڈائریکٹر کبیرخان ان دنوں مسلسل خبروں کی زینت ہیں۔ ایک طرف تو ان کی حالیہ ریلیز شدہ فلم بجرنگی بھائی جان کی کامیابی کے چرچے ہیں تو دوسری جانب ان کی آئندہ آنے والی فلم فینٹم میں دہشت گردی اور پاکستان مخالف عنصر کی وجہ سے اسے میڈیا زیر بحث لارہا ہے۔ اسی فلم کے حوالے سے کبیر خان نے فلم میں مرکزی کردار نبھانے والے سیف علی خان اور کترینہ کیف کے ہمراہ ایک پریس کانفرنس کی تاہم یہ اس وقت بدمزگی کا شکار ہوگئی جب ایک صحافی نے کبیر خان پر چیخنا شروع کردیا۔ صحافی کا دعویٰ تھا کہ کبیر خان پاکستان کی حمایت کرنے کی کوشش کررہے ہیں۔دراصل ہوا کچھ یوں کہ ایک صحافی نے سیف علی خان سے پوچھا کہ فینٹم کے بارے میں ان کے پاکستانی رشتہ داروں کے کیا تاثرات ہیں کیونکہ اس سے قبل ان کی ایک اور فلم ایجنٹ ونود بھی پاکستان میں پابندی کا شکار ہوچکی ہے۔