ممبئی(نیوز ڈیسک) بالی ووڈ اداکار اجے دیوگن کا کہنا ہے کہ شاہ رخ خان سے ان کے کبھی کوئی اختلاف نہیں رہے نا ہی ہم دونوں کے درمیان تعلقات کبھی بھی خراب ہوئے ہیں۔بھارتی میڈیا کو دیئے گئے انٹرویو میں اجے دیوگن کا کہنا تھا کہ بلغاریہ میں فلموں کی شوٹنگ کے دوران شاہ رخ خان سے ملاقات اور ساتھ کھانا کھانا عام سی بات تھی لیکن سوشل میڈیا میں اسے بہت زیادہ اہمیت دی گئی جو ان کی سمجھ سے بالاترہے کیونکہ ہم دونوں کے تعلقات ہمیشہ خوش گوار ہی رہے ہیں۔اجے دیو گن کا کہنا تھا کہ وہ خوشگوارازدواجی زندگی گزاررہے ہیں،وہ خوش ہیں کہ ان کی بیوی کاجول بڑے پردے پرکنگ خان کے ساتھ دوبارہ جلوہ گرہورہی ہیں۔ کاجول نے خود فلمی دنیا سے دوری اختیار کی تھی اور واپسی کا فیصلہ بھی اسی کا ہے، وہ ایک اچھی فلم کے ساتھ بالی ووڈ میں دوبارہ قدم رکھ رہی ہیں کیونکہ فلم بین کاجول اورشاہ رخ خان کی جوڑی کو پسند کرتے ہیں اورانہیں ایک ساتھ دیکھنا چاہتے ہیں۔